نێچیرڤان بارزانی و عه‌مار ئه‌لحه‌كیم دووپاتیێ ل پێدڤیا هه‌بوونا تێكگه‌هشتنه‌كا هه‌ڤپشك د ناڤبه‌را ئالیێن ئیراقی دا دكه‌ن
ئه‌ڤرۆ:
سه‌رۆكێ هه‌رێما كوردستانێ، نێچیرڤان بارزانی و سه‌رۆكێ ڕه‌وتێ حیكمه یا نیشتمانی، عه‌مار ئه‌لحه‌كیم دوهی ئێكشه‌مبی 27-11-2022 ل به‌غدا كۆمبوون و پێكڤه ل دۆر په‌یوه‌ندیێن دناڤبه‌را به‌غدا و هه‌رێما كوردستانێ دا ئاخڤتن.
سه‌رۆكایه‌تیا هه‌رێما كوردستانێ د به‌یاننامه‌یه‌كێ دا ل دۆر وێ كۆمبوونێ، به‌لاڤكر، بۆ ڕوو ب ڕووبوونا ئاسته‌نگێن ل به‌رده‌م وه‌لاتی هه‌ردو ئالیان دووپاتی ل پێدڤیا ته‌باییێ و هاریكاری و تێكگه‌هشتنا هه‌ڤپشك د ناڤبه‌را ئالیێن سیاسی و پێكهاته‌یان دا كر.
سه‌رۆكایه‌تیا هه‌رێما كوردستانێ ل دۆر كۆمبوونا نێچیرڤان بارزانی و عه‌مار ئه‌لحه‌كیم، دبێژیت” هه‌ردو ئالیان دووپاتی ل پێدڤیا ته‌بایێ و هاریكاری و تێكگه‌هشتنا هه‌ڤپشك دناڤبه‌را ئالیێن سیاسی و پێكهاته‌یێن ئیراقێ كر بۆ به‌رهنگاربوونا ئاسته‌نگێن ڤێ قۆناغێ یا وه‌لاتی و پشته‌ڤانیكرنا حوكمه‌تا نوو یا ئیراقێ تاكو بشێت ب سه‌ركه‌فتیانه كارنامه‌یا خوه بجهبینیت”.
هه‌روه‌سا به‌لاڤكر” د كۆمبوونێ دا هه‌ردو ئالی د هه‌ڤڕا بوون كو قۆناغا نوكه و ڕه‌وشا وه‌لاتی وه‌سا دخوازیت ده‌ستهه‌لات و ئالیێن په‌یوه‌ندیدار ل ئیراقێ و هه‌رێما كوردستانێ پێكڤه به‌رپرسیاره‌تیا هه‌ڤپشك هه‌لگرن و هاریكاریێ بكه‌ن بۆ وێ چه‌ندێ كێشه‌یێن وه‌لاتی ب كێشه‌یێن به‌غدا – هه‌ولێرێ ژی ڤه بهێنه چاره‌سه‌ركرن و ئارامی و سه‌قامگیری و سه‌روه‌ریا ئیراقێ یا د پاراستی بن”.
پشتی كۆمبوونا نێچیرڤان بارزانی، سه‌رۆكێ هه‌رێما كوردستانێ و عه‌مار ئه‌لحه‌كیم، سه‌رۆكێ ڕه‌وتێ حیكمه یێ نیشتمانی، قاسم موسه‌وی ئه‌ندامێ مه‌كته‌با سیاسی یا ڕه‌وتێ حیكمه یێ نیشتمانی ڕاگه‌هاند” سه‌ره‌دانا نێچیرڤان بارزانی، سه‌رۆكێ هه‌رێما كوردستانێ بۆ به‌غدا یا گرنگه چونكه هه‌ر گوهۆڕینه‌كا د په‌یوه‌ندیێن د ناڤبه‌را به‌غدا و هه‌رێما كوردستانێ دا په‌یدا دبن كاریگه‌ریه‌كا ئه‌رێنی بۆ چاره‌سه‌ركرنا گه‌له‌ك ژ كێشه‌یان په‌یدا دكه‌ت”.
ناڤبری كو د كۆمبوونا د ناڤبه‌را نێچیرڤان بارزانی و عه‌مار ئه‌لحه‌كیم دا یێ به‌رهه‌ڤ بوو، گوت ژی” هه‌بوونا ڤان كۆمبوون و دیداران د ناڤبه‌را سه‌ركردێن وه‌لاتێ دا د گرنگن بۆ وێ چه‌ندێ پرۆسه‌یا سیاسی ل ئیراقێ ب ئاراسته‌یه‌كێ ئه‌رێنی دا بچیت، ژ پێخه‌مه‌ت په‌یداكرنا سه‌قایه‌كێ دروست بۆ ئاڤه‌دانكرنا ده‌وله‌تا ئیراقێ”.
