نێچیرڤان بارزانی و موسه‌ننا سامه‌رایی دووپاتیێ ل پشته‌ڤانیا حوكمه‌تا ئیراقێ دكه‌ن بۆ سه‌رخستنا كارنامه‌یا وێ
ئه‌ڤرۆ:
دوهی ئێكشه‌مبی 27-11-2022 نێچیرڤان بارزانی، سه‌رۆكێ هه‌رێما كوردستانێ جاره‌كادی سه‌ره‌دانا به‌غدا كر بۆ تمامكرنا دیدار و كۆمبوونێن سه‌ره‌دانا بۆری كو ژ ئه‌گه‌رێ ته‌قینا غازێ ل باژێرێ دهۆكێ نه‌شیابوو وێ سه‌ره‌دانێ تمام بكه‌ت و زڤری بوو هه‌رێما كوردستانێ.
نێچیرڤان بارزانی، سه‌رۆكی هه‌رێما كوردستانێ ل گه‌ل موسه‌ننا سامه‌رایی، سه‌رۆكێ هه‌ڤپه‌یمانیا عه‌زم یا سوننی ل به‌غدا كۆمبوو و ب گۆره‌ی به‌یاننامه‌یه‌كا سه‌رۆكایه‌تیا هه‌رێما كوردستانێ، هه‌ردو ئالیان دووپاتی ل پێدڤی و گرنگیا هاریكاریا هه‌ڤپشك یا هێز و ئالیێن ئیراقی بۆ ده‌ربازكرنا ئاسته‌نگان كر.
د به‌یاننامه‌یا سه‌رۆكایه‌تیا هه‌رێما كوردستانێ دا هاتیه” د كۆمبوونێ دا هه‌ردو ئالیان دووماهی پێشهاتێن سیاسی و ئه‌منی یێن وه‌لاتی باسكر و دووپاتی ل پێدڤی گرنگیا هاریكاریا هه‌ڤپشك یا هێز و ئالیێن ئیراقی بۆ ده‌ربازكرنا ئاسته‌نگان و پشته‌ڤانی ل حوكمه‌تا فیدرالی یا نوو بۆ سه‌رخستنا كارنامه‌یا وێ”.
هه‌ڤده‌م د كۆمبوونێ دا هه‌ردو ئالیان دووپاتی ل پێشڤه‌برنا گیانێ پێكڤه‌بوون و وه‌لاتیبوونێ و كاركرنا هه‌موو ئالیان وه‌كو تیمه‌كی، كر.
سێشه‌مبیا بۆری سه‌رۆكێ هه‌رێما كوردستانێ ل گه‌ل له‌تیف ڕه‌شید، سه‌رۆك كۆمارێ ئیراقێ، محه‌مه‌د شیاع سودانی، سه‌رۆك وه‌زیرێن ئیراقێ، فائیق زێدان، سه‌رۆكێ ده‌ستهه‌لاتا دادوه‌ری ل ئیراقێ، نوری مالكی، سه‌رۆكێ هه‌ڤپه‌یمانیا ده‌وله‌تا قانوونێ، قه‌یس خه‌زعه‌لی، سه‌رۆكێ عه‌سائیب ئه‌هلولحه‌ق، فالح فه‌یاز، سه‌رۆكێ ده‌سته‌یا حه‌شدا شه‌عبی، حه‌یده‌ر عه‌بادی، سه‌رۆكێ هه‌ڤپه‌یمانیا نه‌سر و هادی عامری، سه‌رۆكێ هه‌ڤپه‌یمانیا فه‌تح كۆمببوو.
