هاشمى ل به‌ره پارته‌كا نوو ب دامه‌زرينيت
ئه‌ڤرۆ نيوز:
تارق هاشمى بزاڤا دروستكرنا پارته‌كا سياسى يا نوو دكه‌ت و بڕياره د داهاتى دا، هه‌موو به‌رنامێ پارتێ بێخيته به‌رچاڤ كو پێشبينى دهێته كرن باره‌گايه‌كێ خوه ل هه‌رێما كوردستانێ هه‌بيت.
ب گۆره‌يى ئه‌و زانياريێن باسنيوز به‌لاڤكرين، جێگرێ به‌رێ يێ سه‌رۆك كۆمارێ عيراقێ د بزاڤا دروستكرنا پارته‌كا سياسى دايه، بڕياره پشتى نه‌مانا داعش ل مووسل ب فه‌رمى وێ پارتێ ب راگه‌هينيت و بۆ ڤێ مه‌ره‌مێ ژى كۆمه‌كا پارێزه‌ران گرتينه دا كو ئه‌و تۆمه‌تێن ل سه‌ر وى هاتينه دان ژ لايێ مالكى ڤه ئێكلا بكه‌ت، د هه‌مان ده‌م دا هاشمى دڤێت ببيته شوونگرێ داعش ل ده‌ڤه‌رێ ب تايبه‌ت پشتى هه‌ردو برايان، ئۆسامه و ئه‌سيل نوجێفى كه‌ساتيا خوه ل وان ده‌ڤه‌ران ژ ده‌ست دايى.
هه‌ر ژ به‌ر دژاتيكرنا سيسته‌مێ حوكمرانيا عيراقێ و ميليشياتێن شيعى دهێته پێشبينيكرن كو سونيێن عيراقێ ب ره‌نگه‌كێ به‌رچاڤ پێشوازيێ ل هاشمى بكه‌ت.
هاشمى يێ ل بزاڤا وێ چه‌ندێ كو د هه‌لبژارتنێن داهاتى يێن عيراقێ دا بۆ جڤاتا نوونه‌ران و جڤاتێن پارێزگه‌هان پشكداريێ بكه‌ت و پارته‌كا ب هێز ب هه‌ڤپشكيا چه‌ند لايه‌نێن دى يێن سياسيى هه‌ڤپه‌يمانيه‌كا ب هێز دروست بكه‌ن.
هه‌ر چه‌نده عه‌لاوى بزاڤێ دكه‌ت كو هاشمى بچيته د ناڤ ليستا وى دا، به‌لێ پێشبينى ناهێته كرن كو ل سه‌ر ڤێ داخوازيێ رازى بيت و نه‌ڤێت پارتا خوه بكه‌ته د ناڤ سيسته‌مێ ليسته‌كا به‌رى نوكه دا.
ژ لايه‌كێ دى ڤه هاشمى بزاڤێ دكه‌ت لقه‌كێ پارتا خوه ل هه‌رێما كوردستانێ ژى ڤه‌كه‌ت، به‌لێ دبيت ئه‌ڤه يا سه‌ركه‌فتى نه‌بيت ب تايبه‌ت بۆ كاره‌كێ ژ ڤى ره‌نگى پێدڤيه په‌رله‌مانێ كوردستانێ بڕيارێ ل سه‌ر بده‌ت.
