هزار ئامێرێن پارەدەر (ATM) ل باژێرێن هەرێما كوردستانێ دێ هێنە دانان
ئەمیر ئەترووشی:
پرۆسا تۆماركرنا مووچەخۆر و فەرمانبەران ل «هژمارا من» كۆ سیستەمەكێ پارەدانا دیجیتالییە، بەردەوامە و تۆماركرنا فەرمانبەران گەهشتیە ٢٦٠ هزار كەسان و ١٥٣ هزار كارت ژی دانە وان كەسان یێن كۆ خۆ تۆماركرین.
هەتا دووماهیا سالا ٢٠٢٤، نێزیكێ ١٠٠٠ ئامیرێن پارەدار ATM ل هەمی پارێزگەهـ، قەزا و ناحیێن كوردستانێ دهێنە جێگیر كرن، بۆ وێ ئێكێ دەستێ مووچەخۆران ب ساناهیترین شێوە بگەهیتە مووچەیێن وان.
هژمارا بانكێن پشكداربوو یێن پرۆژەی بەردەوام د زێدەبوونێدانە هەتا نوكە هەر ئێك ژ (BBAC – NBI – RT – Cihan – IIB) پشكدارن و هەمی ژی ژ لایێ بانكا ناڤەندی دان پێ هاتیە دان و پشكداری كرنا وان هاتیە پەسەند كرن. بۆ دەمێ سالەكێیە وەك دەستپێكا تاقیكاری (ئەزموونی)، فەرمانبەرێن نەخۆشخانا ژ دایكبوونا هەولێرێ مووچەیێن خۆ برێكا «هژمارا من» وەرگرتیە.
ل دووماهیكا سالا بوری، هەر ئێك ژ كۆلێژێن ئاداب، چاندن و زانست ل زانكۆیا سەلاحەدین، مووچەیێن خۆ برێكا «هژمارا من» وەرگرتیە.
پشكەك ژ خزمەتگوزاریێن پرۆژەی پێكهاتیە ژ: دەستراگەهشتن ب سەدان ئامیرێن پارەدار ATM و راكێشانا هەمی پارێن بكارهێنەری ب ئێكجار و خۆرایی. ئامیر ب شێوێ ٢٤ دەمژمێران بەردەستن بۆ بكارئینان و فەرمانبەران، هەر دەمەكێ بڤێت ب حەزا خۆ دشێت پارێ خۆ رابكێشیت. دەستراگەهشتن ب قەر (پێشینەیا) جۆراوجۆر یا بانكی. بكارئینانا كارتا بانكی بۆ كرینا ئۆنڵاین و ئامیرێن كارتخوێن بەرنیاس ب PoS. ڤەگوهاستنا پارەی ب شێوەكێ پاراستی و سلامەت بۆ ناڤخۆ و دەرڤەی ولاتی. دەستراگەهشتن ب ئەپلیكەیشنا مۆبایلا بانكی بۆ هندێ دا بەردەوام تە ئاگەهدار بكەت ژ لڤینا ناڤ هژمارا خۆ و ب دەستگەهشتنا ئاگەهناما مۆبایلێ ل دەمێ هاتنا مووچەی.
