هیڤیا وێ ئەوە جهەكێ تایبەت بۆ كارێ وێ هەبیت
سندس سالح سلێڤانەیی
ئەمیرا حسێن، بەرنیاس ب (دەیكا مریەمێ) ئێك ژ شێفێن پشكدارە د فێستیڤالا بازاڕێ هاڤینی دا، ئەوا ل پاركا دهۆك مۆل هاتیە ڤەكرن، د دیدارەكێ دا بۆ رۆژنامەیا ئەڤرۆ گۆت: پشكداریا من دڤێ فێستیڤالێ دا وەكو هەموو فێستیڤالێن دی ب چێكرنا چەند جۆرێن خوارنێن كوردی یە و یا ژ هەموویان سەرەكیتر(ئیپراخن) چنكو ئەم ئامێدی ب چێكرنا ئیپراخان د ناڤدارین، دگەل چەند خوارن و شریناهیێن دی من چێكریە و سوپاس بۆ خودێ بازاڕێ باشە و خەلكەك حەزژ خوارنێن مە دكەت.
دەیكا مریەمێ هێشتا گۆت: ئەز ڤەكرنا ڤان جۆرە فێستیڤالان گەلەك ب گرنگ دبینم، چنكو دەلیڤەیێن كاری پتر بۆ ئافرەتان پەیدا دبن و ئەزا دبینم كو هژمارەكا زۆرا كچ و ژنان هەر ئێك ب كارەكی كو ژ بەرهەمێن دەستێ وانە د پشكدارن، لەورا هیڤیا من ئەوە ئەڤ فێستیڤالە د بەردەوامن، هەروەسا پتر هاریكاریا ئافرەتان بهێتە كرن بهێن پشكداریێ دڤان جۆرە فیستەڤالان دا بكەن.
ل دووماهیێ گۆت: هەتا نوكە ئەم خوارنان ل مال چێدكەین و هەڤژین و كچێن من هاریكاریا من دكەن، لێ هیڤیا من ئەوە رۆژەك بهێت مە جهەكێ تایبەت و یێ بەرفرەه بۆ ڤی كاری هەبیت.
