هێرشكره سه‌ر دكانێن مه‌يى فرۆتنێ يێن ئێزديان ل به‌غدا و چه‌ند كه‌س ژێ كوشتن
ئەڤرو نیوز،بارزان مزووری:
سه‌رۆكێ كوتلا برايه‌تى و پێكڤه‌ژيان ل جڤاتا پارێزگه‌ها مووسل بۆ ئه‌ڤرۆ نيوز ئاشكه‌را كر كو دوهى رێكه‌فتى 4ى گۆلانا 2015ێ ل ده‌مژمێر 6:00ئێڤارى هنده‌ك كه‌سێن نه‌نياس ب ناڤێ چه‌كدارێن تيرۆرستێن داعش هێرش كريه سه‌ر دكانێن مه‌يى فرۆتنێ يێن وه‌لاتيێن ئێزدى ل ل باب مه‌عزه‌م و عه‌لاوى ل ناڤ سه‌نته‌رێ پارێزگه‌ها به‌غدا و د ئه‌نجام دا حه‌ف كه‌س هاتينه كوشتن.
سه‌يدۆ چه‌تۆ، سه‌رۆكێ كوتلا برايه‌تى و پێكڤه‌ژيان ل جڤاتا پارێزگه‌ها مووسل، زێده‌تر گۆت: “ژ وان حه‌فت كه‌سان پێنج ئێزدى نه و وه‌لاتيه‌كێ مه‌سيحى و ئێكێ به‌نگلادشى نه و حه‌فت ژى بريندار بووينه”.
سه‌رۆكێ كوتلا برايه‌تى و پێكڤه‌ژيان ل جڤاتا پارێزگه‌ها مووسل ئاماژه ب وێ چه‌ندێ ژى كر كو ژ ئه‌وان كه‌سێن ئێزدى يێن هاتينه كوشتن دو خه‌لكێ شنگال و سێ ژى رۆژهه‌لاتا ديجله‌يى بوون.
نه‌ڤه‌شارت ژى كو ئه‌و كه‌سێن هاتينه كوشتن ل به‌غدا دوكانێن مه‌يى فرۆتنێ هه‌بوون و مالێن وان ب خوه ل شنگال و شێخانن.
