هەتا نوكە پێنج هەڤپەیمانی بۆ هەلبژارتنێن بهێن یێن ئیراقێ یێن هاتینە تۆماركرن
كۆمسیۆنا بلند یا سەربخوە یا هەلبژارتنان ل ئیراقێ دەمێ تۆماركرنا هەڤپەیمانیێن سیاسی بۆ پشكداریێ د هەلبژارتنێن جڤاتا نوونەرێن ئیراقێدا بۆ ناڤەڕاستا ڤێ مەهێ درێژكر.
د بڕیارا كۆمسیۆنا بلند یا سەربخوە یا هەلبژارتنان ل ئیراقێدا هاتیە» ئالیێن سیاسی یێن خواستا پشكداریێ د هەلبژارتنێن خولا پێنجێ یا جڤاتا نوونەرێن ئیراقێ هەی تاكو دووماهییا دەواما رۆژا 14/5/2025 دشێن ل كۆمسیۆنێ هەڤپەیمانیێن خوە تۆمار بكەن».
پێشتر جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ راگەهاندبوو» هەتا نوكە پێنج هەڤپەیمانیێن نوو بۆ هەلبژارتنێن داهاتی یێن جڤاتا نوونەرێن ئیراقێ یێن هاتینە تۆماركرن».
هەروەسا پێشتر ژی كۆمسیۆنا بلند یا سەربخوە یا هەلبژارتنان ل ئیراقێ، دەمێ مەهەكێ بۆ نووكرنا تۆمارا دەنگدەران راگەهاندبوو، كو بڕیارە هەلبژارتنێن جڤاتا نوونەرێن ئیراقێ ل 11/11/2025 بهێنە ئەنجامدان.
بەری دووماهییا مەها نیسانا بۆری، كۆمسیۆنا بلند یا سەربخوە یا هەلبژارتنان ل ئیراقێ، ئامارەكا فەرمی ل دۆر هێز و ئالیێن پشكداربوویێن هەلبژارتنێن خولا پێنجێ یا جڤاتا نوونەرێن ئیراقێ ئاشكراكربوو كو زێدەتر ژ 330 حزب و پارتێن سیاسی ژ ئالیێ كۆمسیۆنێڤە یێن هاتینە تۆماركرن و دڤێت ئەو هەموو حزب ژی بۆ پشكداریێ د هەلبژارتناندا سەرەدانا كۆمسیۆنێ بكەن.
