وه‌زاره‌تا خواندنا بلند برياره‌ك ده‌ركر
ئه‌ڤرۆنيوز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ بريارا زێده‌كرنا پلانا وه‌رگرتنێ ل زانكۆ وپه‌يمانگه‌هان ده‌ركر، كو ل دووڤ وێ پلانا زێده‌كرنێ وئه‌و كورسيێن ب به‌تال مابوون، 16هزار كورسيێن خواندنێ بۆ وان قوتابيێن كو ل چو جهه‌كى نه‌هاتينه وه‌رگرتن دێ هێنه ته‌رخانكرن.
عه‌باس ئه‌كره‌م، په‌يڤدارێ وه‌زاره‌تا خواندنا بلند راگه‌هاند”ئه‌نجامێن وه‌رگرتنا قوتابيان ل زانكۆ وپه‌يمانگه‌هێن حكومى ل هه‌رێما كوردستانێ پرۆسه‌كا تمام ته‌كنيكى يه، كو ل دووڤ رێنمايێن وه‌زاره‌تا خواندنا بلند وب شێوه‌كێ تمام پرۆفيشنالانه وزانستيانه هاتيه بجهئينان”.
گۆت ژى”هه‌ر جۆره شرۆڤه‌كرنه‌كا نه رۆهن ونه‌زانستيانه بۆ ڤێ پرۆسێ بهێته كرن، دێ زێده‌تر قوتابيان تووشى دلته‌نگيێ كه‌ت وب چو شێوه‌كى خزمه‌تا پرۆسێ ناكه‌ت، له‌وما ئه‌م دلته‌نگ دبين ده‌مێ دبينين نێگه‌رانيێن قوتابيان بهێنه ئيستيغلالكرن بۆ مه‌ره‌مێن سياسى وحزبى، كو ئه‌وژى كاره‌كێ نه‌هه‌ژى ونه‌ساخله‌مه، له‌وما وه‌كو وه‌زاره‌ت ل به‌رچاڤێ مه يا رۆهنه ومه پلان يا هه‌ى بۆ چاره‌سه‌ركرنا هه‌موو گرفتان”.
عه‌باس ئه‌كره‌م دياركر” پشتى راگه‌هاندنا ناڤێن ده‌رچوويان ل زانكۆ وپه‌يمانگه‌هان، نوكه 12 هزار و20 كورسى ل پلانا وه‌رگرتنا ئه‌ڤ ساله ب به‌تالى ماينه، ئه‌ڤه ژى ژئه‌نجامێ وێ چه‌ندێ كو ده‌رچوويان ب خوه كێمتر داخوازى بۆ پشكان پێشكێشكريه، ژبه‌ر ڤێ چه‌ندێ ب به‌تالى ماينه”.
په‌يڤدارێ وه‌زاره‌تا خواندنا بلند راگه‌هاند ژى” بۆ په‌يداكرنا ده‌ليڤێێن زێده‌تر بۆ ده‌رچوويێن 12 ئاماده‌يى، وه‌زاره‌تێ بريار دا ب زێده‌كرنا پلانا وه‌رگرتنێ ل زانكۆ وپه‌يمانگه‌هێن حكومى ب رێژا 10% بۆ پشكێن ئه‌ندازيارى و20% بۆ پشكێن دى”.
ل دووڤ پلانا وه‌زاره‌تا خواندنا بلند، پشتى بجهئينانا ڤان بريارێن وه‌زاره‌تێ، هژمارا كورسيێن به‌رده‌ست بۆ وان قوتابيێن كو ل چو جهه‌كى نه‌هاتينه وه‌رگرتن دگه‌هيته 16 هزار كورسيێن خواندنێ”.
عه‌باس ئه‌كره‌م زێده‌تر گۆت” ئه‌و كورسيێن ژ ئه‌نجامێ زێده‌كرنا پلانێ ل به‌رده‌ستن، ب رێيا هه‌مان سيسته‌مێ ئه‌لكترۆنى دێ هێته به‌رچاڤكرن بۆ وان قوتابيێن كو ل چو جهه‌كى نه‌هاتينه وه‌رگرتن، ب ڤێ چه‌ندێ ژى دێ گرفتا قوتابيێن نه‌هاتينه وه‌رگرتن هێته چاره‌سه‌ركرن ود دو رۆژێن داهاتى دا ب رێيا به‌رنامێن ته‌له‌ڤزيۆنى وچاڤپێكه‌فتنان هه‌موو هووربينيان بۆ ده‌رچوويێن 12 ئاماده‌يى رۆهن كه‌ين”.