وه‌زاره‌تا كاروبارێن شه‌هید و ئه‌نفالكریان:بزاڤێن ب جینۆسایدنیاسینا تاوانێن ئه‌نفالان د به‌رده‌وامن
ئه‌ڤرۆ:
دسالیادا 34 یا هه‌وێن ئه‌نفالێن به‌هدینان، وه‌زاره‌تا كاروبارێن شه‌هید و ئه‌نفالكریان به‌یاننامه‌ك به‌لاڤكر و تێدا دبێژیت، ل سه‌ر بزاڤێن خوه بۆ ب جینۆسایدنیاسینا تاوانێن ئه‌نفالان، كور ژێما به‌عس دژی گه‌لێ كورد ئه‌نجامدابوون، دێ د به‌رده‌وام بین.
ده‌قێ به‌یانناما وه‌زاره‌تا شه‌هید و ئه‌نفالكریان:
به‌ری 34 سالان و ل رێكه‌فتی ( 25 ئابا سالا 1988 ) ڕژێما به‌عسا گور به گورا ئیراقێ ل درێژه‌دانا پروسه‌یا درندانه ب ناڤێ ئه‌نفالێن ره‌ش و دووماهیا قۆناغا حه‌فتێ ژ به‌رنامه‌یێ هاتیه داڕێژتن ژ تاوانێن قڕكرن و جینۆسایدكرنا گه‌لێ كوردستانێ ، ده‌ستێ ڕه‌شێ تاوانێ گه‌هانده ده‌ڤه‌را به‌هدینان و قۆناغا هه‌شتێ ژ وێ تاوانا مه‌ترسیدار ل سنورێ به‌هدینانا خه‌باتكه‌ر ئه‌نجام دا.
قۆناغا دووماهیێ ژ ئه‌نفالا ن بوو كو دهێته هه‌ژمارتن ئێك ژ دڕنده‌ترین كریارێن رژێما به‌عس وتــاكو رۆژا ٦ێ ئیلونا سالا ١٩٨٨ به‌رده‌وام بوویه و رژێما ناڤبری ژ هیچ گونه‌هه‌كا قڕكرنا ئافره‌ت وزه‌لام و زارۆیان ل ده‌ڤه‌را به‌هدینان خوه نه‌دایه پاش وئه‌وێن ماین ژی هاتینه ڤه‌گوهاستن بۆ ده‌شت و بیابانان ل باشوورێ ئیراقێ ب ساخی وب كۆم بن ئاخ كرن.
دیده‌ڤانێن دیرۆكێ دزانن د ئه‌نفالا به‌هدینان دا جودا ژ گۆرێن بكۆم ب ده‌هان هزار مرۆڤێن بێ گونه‌هـ هاتنه بێسه‌رو شوین كرن، ب ده‌هان گوند و ئاڤاهی هه‌رفاندن و كیمیا بارانكرن ل چ جهان ده‌رفه‌تێن ژیانێ بۆ كه‌سه‌كێ نه‌هێلان وب نه‌چاری ئه‌وێن ماین ژی به‌ر ب كۆمه‌ڵگه‌هێن زۆره‌ملی ل سنوورێ هه‌ولێر و ده‌وروبه‌رێن وێ هاتنه ڤه‌گوهاستن و سیاسه‌تا قركرنا گه‌لێ مه ژ ئالیێ رژێمێ ڤه ل ده‌ڤه‌رێ ب دووماهی نه‌هات، به‌لكو ڤێجارێ ب جۆره‌كێ دیتر سیاسه‌تا برسیكرنێ و قركرنا گه‌لێ مه ل كۆمه‌ڵگه‌ها زۆره‌ملی دا به‌رده‌وام بوو.
د ڤێ جینۆسایدێ دا چو جوداهی د ناڤبه‌را پێكهاته‌یێن ڕه‌سه‌نێن كۆمه‌ڵگه‌هێ دا نه‌كر و رژێما به‌عسا ژ ناڤچویی هه‌موو پێكهاته و ئایین و زانایێن ئایینی كرنه ئارمانج و تاوانه‌كا بێ وێنه د دیرۆكا مروڤایه‌تیێ دا ئه‌نجامدا .
د ڤێ بیره‌وه‌ریێ دا دهێته بیرا هه‌موویان كو دادگه‌ها بلند یا تاوانان ل ئیراقێ پشتی ٦٠ روونشتنێن دادگه‌هێ لسه‌ر كه‌یسێن ئه‌نفالێ دووماهی جار لسه‌ر بنه‌مایێن سه‌رجه‌م بڕگه و ماده‌یێن قانوونی یێن دادگه‌هێ و گوتنێن دیده‌ڤانان و ل ژێر روناهیا ڕێككه‌فتنامه و په‌یماننامێن نێڤده‌وله‌تی یێن په‌یوه‌ندیدار گه‌هشتنه وێ باوه‌ڕه‌یێ كو پروسه‌‌یێن هه‌وا ب ناڤێ (ئه‌نفال) جینۆسایده. ژ به‌ر وێ چه‌ندێ هه‌موو پڕۆسه ب جینۆسایدێ هاته نیاسین و سزایێن قانوونی ب سه‌ر ئه‌نجامده‌ران هاتنه سه‌پاندن.
ل بیروه‌ریا ڤێ كاره‌ساتێ دا و ل ده‌مه‌‌كێ دا داخوازێ ژ جڤاكێ نێڤده‌ولله‌تی د كه‌ین ب ئه‌ركێ خوه یێ مروڤایه‌تیێ رابن و د وی ده‌می دا داخوازێ ژ حوكمه‌تا ئیراقا فیدڕالی دكه‌ین كو ب ئه‌ركێ خوه یێ قانوونی و دستووری رابیت ژبۆ قه‌ره‌بووكرنا هه‌موو زیاندارێن ده‌ستێ رژێما به‌رێ ژ چوارچۆڤێ ماده‌یێ ١٣٢ی دستوورێ ئیراقێ و گه‌ره‌نتیا دووباره‌نه‌بوونا تاوانێن ب ڤی ره‌نگی .
وه‌زاره‌تا كاروبارێن شه‌هیدان وئه‌نفالكریان دێ د بزاڤێن خوه‌دا به‌رده‌وام بیت ژبۆ جینۆساید ناساندنا تاوانێن ئه‌نفالێ ژ ئالیێ جڤاكێ نێڤده‌وله‌تی ڤه، هه‌روه‌سا حوكمه‌تا هه‌رێما كوردستانێ پێگیریا خوه ژبۆ خزمه‌تكرنا پتر بۆ كه‌سوكارێن شه‌هیدان و ئه‌نفالكریان دووپات د كه‌ته ڤه.
