وەبەرهێنەرێن بیانی ب گوژمێ پتری 10 ملیار دۆلاران پڕۆژە ل هەرێمێ ئەنجامداینە
پەیڤدارێ دەستەیا وەبەرهێنانێ ل هەرێما كوردستانێ دبێژیت: حوكمەتا هەرێما كوردستانێ گەلەك ئاسانكاری بۆ وەبەرهێنەرێن بیانی كرینە، وەبەرهێنەرێن بیانی ژی 50 پڕۆژە ب گوژمێ پتری 10 ملیار دۆلاران ل هەرێما كوردستانێ ئەنجامداینە.
بەرگەشت ئاكرەیی، پەیڤدارێ دەستەیا وەبەرهێنانێ بۆ رۆژناما ئەڤرۆ گۆت: «پشتی سەرەدانا شاندێ هەرێما كوردستانێ بۆ پاریس و رۆما ل گەل سازیێن تایبەتێن وەبەرهێنانێ و سەرمایەدارێن وان كۆمبووین و وەبەرهێنەرێن وان بڕیار دایە بهێنە كوردستانێ و دێ چەندین پڕۆژەیان ل كوردستانێ ئەنجامدەن، دیسا بڕیار هاتییە دان هەژمارەكا وەبەرهێنەرێن هەرێما كوردستانێ سەرەدانا پاریس و ئیتالیا بكەن و ڕێككەفتنێن تێكگەهشتنێ و بازرگانیێ ئیمزا بكەن، هەروەسا بڕیارە شاندەكێ هەرێما كوردستانێ سەرەدانا چەند وەلاتێن ئورۆپا بكەت، وەكو فرەنسا و ئیتالیا، ل گەل وان ڕێككەفتن د بیاڤێن ئابووری و بازرگانی دا بهێتە كرن».
ناڤهاتی گۆتژی: «وەبەرهێنەرێن بیانی ل هەرێمێ 50 پڕۆژە ب گوژمێ پتری 10 ملیار دۆلاران هەنە، هەروەسا پتری 28 پڕۆژەیێن وەبەرهێنانێ یێن هەڤپشك ژی ل هەرێما كوردستانێ هەنە، كو سەرمایێ وان دگەهیتە ملیارەك و 500 ملیۆن دۆلاران، بڕیارە ئەڤ سالە وەبەرهێنەر و وەزیرێ وەبەرهێنانا سعودیێ ژی بهێنە هەرێما كوردستانێ، داكو پڕۆژەیێن هەڤپشك و ڕێككەفتنێن هەڤپشك ئەنجام بدەن».
