وەزارەتا ئەوقافێ بھایێن نوو بۆ چوونا عومرێ دیارکرن
ئەڤرۆ:
رێڤەبەرێ گشتیێ حەج و عومرێ ل وەزارەتا ئەوقاف و کاروبارێن ئایینی ل حوکمەتا ھەرێما کوردستانێ، دوھی د کۆنگرەکێ رۆژنامەڤانی دا راگەھاند، سێ بھا بۆ چوونا عومرێ ل گۆرەی نێزیکی و دووریا جھێ مانا عومرەچیان ژ مالا خودێ ھاتینە دیارکرن و مۆلەتا کارکرنێ ژی ب ٤٠ کۆمپانیان ھاتیە دان.
قاسم بەرزنجی، رێڤەبەرێ گشتیێ حەج و عومرێ ل وەزارەتا ئەوقاف و کاروبارێن ئایینی ئاشکرا کر، ل دووڤ وان مەرج و رێنمایێن رێڤەبەریا حەج و عومرێ بۆ ئەڤ سالە دیارکرین و ھەر ژ نوکە کۆمپانی دشێن وەلاتیان گازی بکەن بۆ چوونا عومرێ و گۆت: “ب فەرمی ٤٠ کۆمپانیان مۆلەت پێ ھاتیە دان عومرەچیان ب بەن بۆ کەعبێ، ل دھۆک ١٠ کۆمپانی، ھەولێر ١٥ و سلێمانیێ و ئیدارا گەرمیان ژی ١٥ کۆمپانیان رێ پێ ھاتیە دان وەلاتیان بۆ عومرێ ب بەن”.
بەرزنجی ئاماژە دا وێ چەندێ ژی کو بھا ل گۆرەی نێزیکی و دووریا جھێ مانا عومرەچیان ل مەککەھا پیرۆز ھاتینە دانان، کو سێ بھانە، ئەو ئوتێلێن نێزیکی مزگەفتا پێغەمبەری (س. ل) د ناڤ مەککێ ب ٩٧٥ دۆلارانە و ئەوێن پیچەک دوورتر ٩٥٠ دۆلارن و بۆ جھێن دوور ژی ٩٢٥ دۆلار ھاتینە دانان و گۆت: “دڤێت ئۆتێل ژ سێ ستێران کێمتر نەبن”.
