وەزارەتا پەروەردێ چاوانیا دابەشکرنا مووچەی بەلاڤ دکەت
ئەڤرۆ نیوز:
وەزارەتا پەروەردێ یا هەرێما کوردستانێ میکانیزما دابەشکرنا مووچێ وەزارەتا خوە رادگەهینیت و گۆتیە، دڤێت رێڤەبەرێن گشتی یێن پەروەردەیان بەرنامەکێ دانن کو قەرەبالغ دروست نەبیت و پابەندی رێنمایێن ساخلەمیێ ژی بن.
لدووڤ میکانیزمێن وەزارەتا پەروەردە، رێڤەبەرێن گشتی یێن پەروەردەیان ب هەڤکاریا رێڤەبەرێن پەروەردەیان لیستا مووچێن باخچە، قوتابخانە و پەیمانگەهان بدەنە بانکێن خوە یێن دیاریکری، ب شێوەکێ قەرەبالغ ب هیچ جۆرەکێ دروست نەبیت.
گۆتیە ژی، دڤێت رێڤەبەرێن باخچە، قوتابخانە و پەیمانگەهان و هاریکارێن وان مووچان بگەهیننە مالێن مامۆستایان.
بۆ هندێ کو رێیا هاتنوچوونێ پێ بهێته دان، پێدڤیە هەموو رێڤەبەر نڤیسارەکێ بۆ خوە و هاریکارێن خوە بکەن پێدڤیە بەروار ل سەر بیت و ب تنێ بۆ وێ رۆژێ ب کار بهێت.
لدووڤ راگەهاندنا وەزارەتا پەروەردێ هەر مامۆستایەکێ مالا وی نێزیکی مالا رێڤەبەری یان هاریکارێ وی بیت، دشێت بچیتە مالا وی و مووچێ خوە ژێ وەربگریت.
هەروەسا گۆتیە، ل دەمێ وەرگرتنا مووچەی ل بانکێ و گەهاندنا وی بۆ مامۆستایان، دڤێت پابەندی هەموو رێنمایێن ساخلەمیێ بن و پێدڤیێن خوە پارێزیێ ب کاربینن.
