پارتێن سیاسی پشتەڤانیێ ل قۆناغا ئاشتیێ ل تورکیا دکەن
سەرەدانا دەم پارتی بۆ پارتێن سیاسی یێن تورکیا ب دووماهی هات و د هەڤدیتنان دا هەموو پارتێن سیاسی یێن تورکیا پشتەڤانیا خوە بۆ قۆناغا ئاشتیێ و چارەسەرکرنا پرسا کوردی ل تورکیا دیار کرن و ئەحمەد تورک ژی دبێژیت دڤێت ڤێ دەلیڤا دیرۆکی ژ دەست نەدەین.
شاندێ پارتا دەم ب سەرۆکاتیا ئەحمەد تورک دوهی ل گەل پارتا کۆماریا گەل کۆمبوو و پشتی کۆمبوونێ سەرۆکێ پارتا کۆماریا گەل ئۆزگور ئۆزەل راگەهاند کو وان بەری نها ژی دیار کرینە کو پێدڤیا تورکیا ب ئاشتیێ و چارەسەرکرنا پرسا کوردی هەیە، دڤێت پرسا کوردی ل پەرلەمانێ تورکیا بهێتە چارەسەرکرن، وەکو پارتا کۆماری ئەو نابنە پشکەک ژ پرۆژەیێن چو هێزەکێ، لێ وان دڤێت شەڕێ نها ل تورکیا ب دووماهی بهێت و گۆت: (وەکو پارتا کۆماریا گەل ئەم پشتەڤانیێ ل دەستپێکرنا قۆناغەکا نوو بۆ راگرتنا شەڕی و دەستپێکرنا ئاشتیێ ل تورکیا دکەین، پرسا کوردی ژی دڤێت ل پەرلەمانێ تورکیا بهێتە چارەسەرکرن و ژ بۆ ڤێ یەکێ ژی پێدڤیا تورکیا ب دستوورەکێ نوو هەیە).
هەر دوهی شاندێ پارتا دەم ل گەل عەلی باباجان سەرۆکێ پارتا DEVA کۆمبوو و پشتی کۆمبوونێ عەلی باباجان بۆ دەزگەهێن راگەهاندنا تورکیا دیار کر، وان بەری نها ژی پشتەڤانیا خوە بۆ چارەسەرکرنا پرسا کوردی دیار کرینە، دڤێت مافێن کوردان ل تورکیا بهێتە پاراستن و ژ بۆ ڤێ یەکێ ژی ئەو پشتەڤانیێ ل قۆناغا نها ل تورکیا دکەن و دڤێت هەموو هێزێن سیاسی د چارەسەرکرنا پرسا کوردی دا پشکدار بن و گرنگە پرسا کوردی ل پەرلەمانێ تورکیا بهێتە چارەسەرکرن، دڤێت ڤێجارێ هەموو تشت ب رەنگەکێ ئاشکرا بهێنە ئەنجام دان و دڤێت جڤاکێ تورکیا هەموو تشتەکێ بزانیت.
ئەو یەک د دەمەکێ دایە کو بەری دو رۆژان شاندێ دەم پارتی ل گەل ئەحمەد داوود ئۆغلۆ سەرۆکێ پارتا پاشەرۆژێ یا تورکیا و سەرۆک وەزیرێن بەرێ یێ وی وەلاتی ژی کۆمبوو و پشتی کۆمبوونێ داوود ئۆغلۆ بۆ دەزگەهێن راگەهاندنێ دیار کر، ئێدی دەم یێ هاتی تورکیا پرسا کوردی چارەسەر بکەت، دڤێت مافێن گەلێ کورد ل تورکیا بهێنە پاراستن و دڤێت چو ئاستەنگی ل هەمبەر پەروەردەیا ب زمانێ کوردی ژی ل تورکیا نەمینن و گۆت: (ب چارەسەرکرنا پرسا کوردی دێ تورکیا ژی گەلەک بهێز کەڤیت، نها هندەک وەلاتێن جیهانێ دخوازن بابەتێ پرسا کوردی ل دژی تورکیا بکار بینن، لێ هەکە تورکیا پرسا کوردی چارەسەر بکەت ئێدی ئەو نەشێن وی بابەتی وەکو کارتەکێ ل دژی تورکیا بکار بینن).
هەر دوهی دەولەت باخچەلی سەرۆکێ پارتا بزاڤا نەتەوەپەرست یا تورکیا ژی راگەهاند دەرگەهێن ئاشتیێ ل تورکیا ڤەکرینە، ئێدی قۆناغەکا نوو دەستپێکریە و دڤێت هەر کەس هەست ب بەرپرسیاریا خوە یا دیرۆکی بکەت.
