پارێزگارێ دهۆكێ به‌رێ بنیاتی بۆ هه‌ژماره‌كا پڕۆژه‌یان ل ده‌ڤه‌رداریا به‌رده‌ڕه‌ش دانا
ئاكرێ، ره‌مه‌زان زه‌كه‌ریا:
د. عه‌لی ته‌ته‌ر، پارێزگارێ دهۆكێ ب هه‌ڤالینیا شانده‌كی سه‌ردانا ده‌ڤه‌رداریا به‌رده‌ڕه‌ش كر و به‌رێ بنیاتی بۆ هه‌ژماره‌كا پڕۆژه‌یێن خزمه‌تگوزاری ب گوژمێ چار ملیار و 585 ملیۆن دیناران دانا.
ب مه‌ره‌ما گرنگیدان ب پڕۆژه‌یێن خزمه‌تگوزاری ئه‌وێن ل ده‌ڤه‌رداریا به‌رده‌ڕه‌ش دهێنه ئه‌نجامدان ب چاڤدێری و به‌رهه‌ڤبوونا د. عه‌لی ته‌ته‌ر، پارێزگارێ دهۆكێ و مه‌ردان خدر، به‌رپرسێ لقێ نه‌هێ پارتی ل ئاكرێ و ئیسماعیل مسته‌فا، ده‌ڤه‌ردارێ به‌رده‌ڕه‌ش و چه‌ند رێڤه‌به‌رێن گشتی یێن په‌یوه‌ندیدار به‌رێ بنیاتی بۆ هه‌ژماره‌كا پڕۆژه‌یان ل سنوورێ ده‌ڤه‌رداریا به‌رده‌ڕه‌ش هاته دانان
به‌رێ بنیاتی بۆ تمامكرنا جۆتسایدێ 40 مه‌تری ل ناوچه‌داریا داره‌تۆ ب درێژاهیا هزار و 950 مه‌تران و فره‌هیا 20 مه‌تران وه‌كو قووناغا ئێكێ ب گوژمێ 439 ملیۆن دیناران دانا، دیسا به‌رێ بنیاتی بۆ چێكرنا سایدێ دویێ ل سه‌نته‌رێ به‌رده‌ڕه‌ش ب درێژاهیا ئێك كیلۆمه‌تر ب گوژمێ 377 ملیۆن دیناران دانا و به‌رێ بنیاتی بۆ چێكرنا رێكێن ناڤخوه‌یی ل سه‌نته‌رێ به‌رده‌ڕه‌ش ب گوژمێ 531 ملیۆن دیناران دانا.
هه‌ر د وێ سه‌ره‌دانێ دا پارێزگارێ دهۆكێ به‌رێ بنیاتی بۆ چێكرنا رێكێن ناڤخوه‌یی ل سه‌نته‌رێ ناوچه‌داریا كه‌له‌ك ب گوژمێ 407 ملیۆن دیناران و به‌رێ بنیاتی بۆ چێكرنا رێكێن ناڤخوه‌یی ل سه‌نته‌رێ ناوچه‌داریا رۆڤیا ب گوژمێ 421 ملیۆن دیناران دانا.
دیسا ل دۆر ئاڤاكرنا قوتابخانان ژی، به‌رێ بنیاتی بۆ ئاڤاكرنا دو قوتابخانه‌یێن 12 پۆلی ل گوندێ كانیلان ب گوژمێ 518 ملیۆن دیناران و قوتابخانه‌كا دی یا 12 پۆلی ل گوندێ دوسته‌ك ب گوژمێ 488 ملیۆن دیناران دانا.
پارێزگارێ دهۆكێ بۆ ده‌زگه‌هێن راگه‌هاندنێ گۆت: “ل سالا بۆری ب گوژمێ پتر ژ 66 ملیار دیناران پڕۆژه ل سنوورێ ده‌ڤه‌رداریا به‌رده‌ڕه‌ش هه‌بوون، ئه‌ڤ ساله ژی هه‌ژماره‌كا دی یا پڕۆژه‌یا دێ هێنه چێكرن و كاروانێ ئاڤه‌دانیێ ل هه‌موو ده‌ڤه‌رداری و ناوچه‌داری و كۆمه‌لگه‌ه و گوندان دێ یێ به‌رده‌وام بیت”.
دیسا هه‌ر د چارچوڤێ دووڤچوون و دانانا به‌رێ بنیاتی و ڤه‌كرنا پڕۆژه‌یان، پارێزگارێ دهۆكێ به‌رێ بنیاتی بۆ هه‌ژماره‌كا پڕۆژه‌یان ل هه‌ردو ناوچه‌داریێن زاویته و مانگێشكێ یێن سه‌ر ب ده‌ڤه‌رداریا دهۆكێ ڤه دانا و هه‌ژماره‌ك پڕۆژه ژی هاتنه ڤه‌كرن.
