پێداچوون د پرۆگرامێن پەروەردێ دا دێ ژ كارێن مە یێن دەستپێكی بیت
سالار محەمەد دۆسكی:
د. كوردستان مەلا تاهر دۆسكی مامۆستا زانكۆیێ و بەربژارا هەژمارە (40) ل سەر لیستا (190) یا پارتی دیموكراتی كوردستان، بۆ هەلبژارتنێن خولا شەشێ یێن پەرلەمانێ كوردستانێ بۆ رۆژناما ئەڤرۆ گۆت: هەكە چووینە پەرلەمانی ژ كارێن مە یێن سەرەكی ل پەرلەمانێ كوردستانێ دێ جێبەجێكرنا پرۆگرامێ لیستا (190) یا پارتا مە بیت كو پرۆگرامەكێ تژی هاتیە بەرهەفكرن و هەمی بیاڤێن ژیانێ بخوەڤە دگریت، ل هەمان دەم وەك مامۆستایەكا زانكۆیێ من ژی پرۆگرامەكێ باش بەرهەفكریە و دێ كاری ل سەر كەم، كو زێدەتر دەلیڤەیێن كاری بۆ گەنجان بهێنە دابینكرن و قانوونا كاركرنێ بهێتە بجهئینان و پیڤەر بۆ كاركرنێ بهێنەدانان، گرنتی یا خانەنشینیێ بو كرێكاران هەبیت و هەر كارەكێ نە چارڤەرێكری بهێتە رێكا وان وەك فەرمانبەرێن حوكمەتێ سەرەدەری ل گەل بهێتەكرن، دێ كار ل سەر موكمكرنا خێزانا كوردی كەین و ساخلەم تر وەك جاران رۆلێ خوە د ناڤا جڤاكی دا بگێریت و ئەڤ ژی دێ ب پرۆژە قانوونان هێتە پەیروكرن و بجهئینان.
هەمان بەربژارا پارتی گۆت: دێ پێشڤەبرنا پرۆگرامێن پەروەردەیی و پێشڤەبرنا ژینگەهەكا ساخلەم بۆ وەلاتێ مە و تایبەت باژێرێ مە ژ كارێن مە بیت و ئەڤە ژی بۆ وێ چەندێ كو زارۆكێن مە ب ساخلەمیەكا باش تێدا بژین و رۆلێ خوە ل پاشەرۆژێ هەبیت، خۆشكرنا ژین و ژیارا پێشمەرگە و زیندانیێن سیاسی و خێزانێن شەهیدان و ئەنفالكریان دێ ژ كارێن مەیێن سەرەكی بیت، دێ كاركەین كەرتێ چاندنێ ل دەڤەرا مە زێدەتر گرنگی پێ بهێتەدان و بەرهەمێ جۆتیاران و خودانكرنا تەرشەوكەوالی ل كوردستانێ بەرهەمێ خوە یێ جاران هەبیت و خەلكی ئێدی حەزا چوونا سەر گوندان و مولكێ چاندنێ ل گوندی هەبیت و ئێدی مە پێدڤی ب بەرهەمێ دەرڤە نەبیت و زێدەتر مفا ژ خێر و بێرێن وەلاتێ مە بهێتە وەرگرتن و دێ هەمی بزاڤێن مە ئەو بن پرەك بین د ناڤبەرا خەلكێ خوە و حوكمەتێ دا .
بەربژێرا هەژمارە (40) ژ لیستا (190) یا پارتی گۆت: داخوازێ ژ خەلكێ پارێزگەها دهۆكێ دكەم دەنگی بدەنە لیستا پارتی، چونكو پارتی خودانا دو شۆڕەشێن كوردی یێن مەزن بوویە و گەلەك قوربانی داینە و پارتی خودانا ڤی مللەتی یە و هەر دەم ل تەنگاڤیان هەر پارتی خوە ل ڤی مللەتی كریە خودان و شەرێ داعشێ باشترین نموونەیە و ئەو هێزا تیرۆرستی هەر ل سەر دەستێن پێشمەرگێن پارتی و ب رێبەری یا جەنابێ سەرۆك بارزانی هاتیە شكاندن، پارتی بوویە قەوارێ هەرێما كوردستانێ پاراستی و خەونا نەحزێن و دوژمنێن مللەتی كیرە دگورێ دا و ب ئومێدین هەر وەك جاران دێ پارتی لیستا سەركەفتی و یا ئێكێ یا مللەتی بیت.
