پەرلەمانێ کوردستانێ دێ کۆم بیت
ئەڤرۆ نيوز:
دەستەیا سەرۆکاتیا پەرلەمانێ کوردستانێ گازی ئەندامێن پەرلەمانێ کوردستانێ دکەت کو ل روونشتنا رۆژا سێشەمبی یا پەرلەمانێ کوردستانێ ئامادەبن و راستڤەکرنا پەیرەوێ ناڤخۆ یێ پەرلەمانێ کوردستانێ تەوەرێ سەرەکی یێ روونشتنێ یە.
د نڤیسارێ دا کو ئیمزا جێگرێ سەرۆکێ پەرلەمانێ کوردستانێ ل سەرە، ئاماژە ب وێ چەندێ کریە کو ب گۆرەی حوکمێ برگا 2 ژ ماددێ 17 و بریگا 1 یێ ماددێ 18 ژ پەیرەوێ پەرلەمانێ کوردستانا عیراقێ یێ ژمارە 1 یێ سالا 1992 یێ راستڤەکری دەستەیا سەرۆکاتیا پەرلەمانی بڕیار دا، روونشتنا ژمارە 7 یا ئاسایی یا خولا پاییزێ بێھتە ئەنجام دان.
د کارناما کۆمبوونێ دا ئاماژە ب وێ چەندێ کریە کو کۆمبوون ل دەمژمێر 11ی بەری نیڤرۆیا رۆژا سێشەمبی 6ی شوباتا 2018ێ بیت.
ئامینا زکری، جێگرا سەرۆکا فراکسیۆنا پارتی دیموکراتی کوردستان ل پەرلەمانێ کوردستانێ بۆ ئەڤرۆ گۆت: “کۆمبوونا رۆژا سێشەمبی دێ تەمامکەرا کۆمبوونا بۆری یا پەرلەمانێ کوردستانێ بیت و تەوەر ژی د تایبەتن ب دانوستاندن ل سەر راستڤەکرنا پەیرەوێ ناڤخۆ یێ پەرلەمانێ کوردستانێ و پرۆژێ قانوونا ئەڤ و ئاڤرێژان ل گەل گوھۆڕینا ئەندامەتیا دو ئەندامان ژ لژنا قانوونی بۆ لژنێن دی یێن پەرلەمانی”.
