پەیاما پارتی و سەرۆك بارزانی بۆ حوكمەتا بەغدا و ئالیێن ئیراقی هاتە هنارتن
سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ ڕاگەهاند: شاندێ پارتی دیموكراتی كوردستان د سەرەدانا خوە دا بۆ بەغدا پەیاما پارتی و سەرۆك مەسعود بارزانی ب حوكمەتا بەغدا و ئالیێن ئیراقی گەهاند، هەروەسا دیاركر: پشتی دەركرنا ڕێنمایێن قانوونا بودجەیا گشتی یا ئیراقێ و سەرەدانا شاندێ حوكمەتا هەرێما كوردستانێ بۆ بەغدا، پێدڤیە ژ نوكە و وێڤە مەهانە پشكا هەرێما كوردستانێ ژ بودجەیا گشتی یا ئیراقێ ب گۆرەی قانوونا بودجەی بهێتە هنارتن.
ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» چوونا شاندێ پارتی دیموكراتی كوردستان بۆ بەغدا گەلەك یا گرنگ و پێدڤی بوو، شاندێ پارتی د چارچۆڤەیێ سەرەدانا خوە دا بۆ بەغدا پەیاما پارتی دیموكراتی كوردستان و سەرۆك بارزانی گەهاندە حوكمەتا بەغدا و هەڤپەیمانیا ئیدارەیا دەولەتێ و ئالیان، هەروەسا چاڤەڕێ ئەنجاما وێ سەرەدانێ دكەین چونكە شاندێ پارتی ل ڕۆژا پێنجشەمبیا بۆری زڤریە هەرێما كوردستانێ».
سەبارەت هنارتنا پشكا هەرێما كوردستانێ ژی ژ بودجەیا گشتی یا ئیراقێ، ڤیان سەبری دبێژیت» پشتی بەلاڤكرنا ڕێنمایێن بجهئینانا قانوونا بودجەیا گشتی یا ئیراقێ و پشتی چوونا شاندێ حوكمەتا هەرێما كوردستانێ بۆ بەغدا و ڕادەستكرنا پەترۆلێ و داهاتیێن نە پەترۆلی پێدڤیە ژ نوكە و وێڤە بەغدا مەهانە پشكا بودجەیا هەرێما كوردستانێ، كا چاوان د قانوونا بودجەیا گشتی یا ئیراقێ دا ئاماژە پێ هاتیە كرن ب وی شێوەی بهنێریت.
