چو راستی بۆ وەرگرتنا 75 هزار دیناران بەرامبەر جهێ گورستانێ نینە
ئەڤرۆ نیوز، نیوار محەمەد سەلیم:
رێڤەبەریا باژێرڤانیا پارێزگەها دهۆکێ راگەهاند کو چو راستی بو وەرگرتنا 75 هزار دیناران بەرامبەر جهێ گۆرستانێ بۆ مریان نینە.
ئیسماعیل مستەفا، بەرپرسێ پەیوەندی و راگەهاندنێ ل باژێرڤانیا پارێزگەها دهۆکێ بۆ ئەڤرۆ نیوز گۆت: “بابەتەک یێ ل تۆڕێن جڤاکی بەلاڤ بووی و بەحس ل وێ چەندێ دکەت کو پێدڤیە هەر خێزانەکا مریێ خۆ ل گۆرستانێ ڤەشێریت، پێدڤیە 75 هزار دیناران بدەت، بەلێ د راستی دا ئەڤ بابەتە یێ دوورە ژ راستیێ”.
زێدەرتر گۆت: “باژێرڤانیا دهۆکێ خزمەتکرنا گۆرستانێ ب کارەکێ گەلەک گرنگ دزانیت و هەموو خزمەت ژی بێ بەرامبەر بۆ دهێنە دابینکرن، چو چێکرنا رێیێن ناڤخۆ یان کەسکرنێ بیت. هەتا مە تانکەرەک گرتیە ئاڤێ دکەتە وان تانکان یێن خەلکی بۆ خۆ داناین و ئەو ژی بێ بەرامبەرە”.
ئیسماعیل مستەفا، بەرپرسێ پەیوەندی و راگەهاندنێ ل باژێرڤانیا پارێزگەها دهۆکێ دا زانین ژی کو ئەوان گەلەک بەر ژ ناڤ گۆرستانێ راکرینە و خێرخوازەکی ژی 10 دونەمێن ئەردی ل وێرێ بۆ گۆرستانێ تەرخانکرینە و ب ڤێ چەندێ ئەو ئەرد بەهرا 14 سالێن دی دکەت هەکە رێژا مرنێ ب ڤی رەنگی بیت”.
ئیسماعیل مستەفای نەڤەشارت ژی کو د ماستەر بلانا نوو ژی دا 60 دونەم ل پشت فاملی مۆل هاتینە دابینکرن.
ئیسماعیل مستەفا، بەرپرسێ پەیوەندی و راگەهاندنێ ل باژێرڤانیا پارێزگەها دهۆکێ هیڤی ژ خەلکی خواست ب تایبەت ئەڤێن پەیجێن تۆڕێن جڤاکی ب کار دئینن، بابەتێن بێ بنەما بەلاڤ نەکەن و هەتا تشتی پشت راست نەکەن بەلاڤ نەکەن.
