چەندین بریار ل دۆر فروتنا دەرمانان ل شێخان هاتن ده‌ركرن
ئەڤرۆ نیوز،بارزان مزووری:
قائیمقامێ قەزا شێخان، سه‌ردار یه‌حیا بۆ ئەڤرۆ نیوز ئاشكرا كر كو ل دووڤ فەرمانا وەزارەتا ناڤخوه یا حوكمەتا هەرێما كوردستانێ ژبۆ كونترۆلكرنا دەرمانێن دەرمانخانە و كوگەهێن دەرمان و كۆمپانیێن دەرمانان ل دەرڤەی هەرێمێ بۆ ناڤ هەرێمێ دئینن ئەو دەرمانێن قەدەغەكری و یێن سەختە و ده‌م ب سەرڤەچوی، مە لژنەكا تایبەت پێكئینايه ژ ساخلەمیێ و پۆلیس و ئاسایشێ پێك دهێت ل قەزا شێخان د ئێكەم پێنگاڤ دا پشتی ئەڤ لژنە هاتيه پێكئینان، دووڤچوون ل سەر وان دەرمانخانە و كوگەهێن دەرمانان يێن دناڤ سەنتەرێ شێخان هات كرن ژبو دەستەسەركرنا وان دەرمانێن قەدەغەكری و ده‌م ب سەرڤەچوی.
خویاكر كو چەندین بریارێن نوو هاتن دان كو بەری نها ئەو رێنما نەدهاتن بكارئینان ل دەرمانخانەیان ژوان بریاران ژی پێدڤیە هەموو دەرمانخانان ئامیرێ سەرژمێریا ئەلكترۆنی هەبیت وبهایێ دەرمانی دناڤ وی ئامیری دا یێ داخلكری بیت دیسان ئەو ئامیر ل دۆر دەرمانێ ب سەرڤەچوی نوژداری ئاگەهدار بكەت ب وی ئامێری بەری بدەتە نەخوه‌شی دیسان دەمێ ئەو دەرمان بهێت دان ل دەرمانخانێ پسۆلەكا ئەلكترۆنی بها و مێژوویا وێ رۆژێ دگەل ناڤێ دەرمانخانێ ل سەر بیت دیسان ئەو نوشدارێ ل بەر دەرمانخانێ جلكێن تایبەت یێن نوژشداران ب رەنگێ سپی ل به‌ربيت ،بهایێ دەرمانان ژی دێ ل بن كونترۆلا لژنێ بیت نەكو خودانێ دەرمانخانێ ل ب كه‌يفا خوه بفروشیت .هەر دەرمانخانەیەكا ڤان رێنمایان بكارنەئینیت، دێ هێته سزادان و دەرمانخانە دێ هێت داخستن بۆ ده‌مێ چەند رۆژان دا دوبارە ڤێ كریارێ ئەنجام نەدەت.
