ڕۆلێ دایک و بابان د سەرکەفتنا قوتابییان دا

ئاشتی سالح

دەستپێکا سالا نوویا خواندنێ قووناغەکا زێدە گرنگ و چارەنڤێسازە د ژیانا هەبوونا زارۆکی دا، ژ بەر کو ئەڤ دەمە بنەمایێ سەرکەفتن یان ژی پاشکەفتنا وان پێکدئینیت. ژ بەر ڤێ چەندێ، پێدڤیە دایک و باب هەر ژ ڕۆژێن ئێکێ یێن قوتابخانێ ڕۆلەکێ چالاک و ئەکتیڤ بینن و ب چ ڕەنگان پشت نەدنە زارۆکێن خۆ، چنکو سەرکەفتنا زارۆکی ل قوتابخانێ ب تنێ نە یا ماموستایانە، بەلکو ئەرکەکێ سەرەکی یێ خێزانێ ژی نە.
ئێک ژ کارێن هەر گرنگ کو دایک و باب دشێن بکەن، ئاگەهداربوونا رۆژانە یا زارۆکێن خۆیە. دەمێ زارۆک ژ قوتابخانێ دزڤڕن مال، دڤێت دایک یان باب دەمەکی بۆ پشکبینینێ جودا بکەن؛ بەرێ خۆ بدەنە پەرتووک و دەفتەرێن وان، پسیارا دەواما ڕۆژێ ژێ بکەن و بێژنێ: «مامۆستای چ ئەرک یان کارێ مال دا هەوە؟». ئەڤ پرسیارە و ئەڤ پشکداریپێکرنە نە تنێ هاریکاریا زارۆکی دکەت کو ئەرکێن خۆ ب دەم بکەت، بەلکو هەستەکێ بەرپرساتیێ د نه‌ها وی دا دروست دکەت و دزانیت کو چاڤدێرەکێ هشیار ل پشت هەی. هەروەسا، پێدڤیە دایک و باب هەردەم هەڤکاربن و هانبەستیێن وان بکەن، بەلێ نە کو ئەرکان ب خۆ ب بۆ خوە بۆ بکەن، بەلکو هاریکاریا وی بکەن هەتا کو ب تنێ شیانێن خۆ بکاربینیت و چیدکەت.ژ ئالییەکێ ڤە، لایەنێ ساخلەمی و خۆراکێ پێگەهەکێ سەرەکی د هەستا زارۆکی و شیانێن وی یێن داهێنەر و تێگەهشتنێ دا هەیە. سەبارەت دایکان ژی، ب هیچ ڕەنگەکی نەدروستە و نەشیاوە زارۆکێ خۆ بێ خوارن و ب زکێ ڤالا فرێ بکەنە قوتابخانێ. ب تایبەتی «تێشتێ» کو ئەو خوارنا سەرەکی و بنەمایی یا دەسپێکا ڕۆژێ یە؛ مێشکێ زارۆکی پێدڤی ب ئینرژیێ یە دا کو بکاریت گوهداریا مامۆستای بکەت و پێزانینان وەربگریت. خوارنا ب مفا و تێشتەکا ساخلەم دێ زارۆکی ب هێز و چالاک هێلیت و سەرنجا وی ل پۆلی زێدە کەت.
گرنگە هەروەسا پەیوەندییەکا بەردەوام و ب هێز د ناڤبەرا مال و قوتابخانێ دا هەبیت. دێ باشتر بیت هەکە دایک یان باب هەڕ و حەفتیان جارەکێ بچنە قوتابخانێ، سەرەدانا مامۆستایێن زاڕۆکێن خۆ بکەن و باخڤن. ڤێ چەندێ مفا هەیە دا هەکە کێماسیەک، ئاریشەیەک یان پاشکەفتنەک ل دەستپێکێ هەبیت، زوی و هەر ل دەستپێکا سالێ بێتە چارەسەرکرن، بەری کو ببنە ئاریشەیێن مەزن و کارتێکرنێ ل سەر ئاستێ زارۆکی بکەن.
د دوماهیێ دا، ژ بیر نەکەین کو زارۆک سامانێ مە یێ مەزنترن و پێدڤییە هەردەم ل بن چاڤدێریا دایک و بابان ڤە بن. چاڤدێری و پشتبەستنا خێزانێ بۆ زارۆکی، دەتە زارۆکی باوەرییەکا مەزن ب خۆ و ب شیانێن خۆ، و دکتە کەسەکێ سەرکەفت، ژیر و مفادار بۆ جڤاکی. ل سەر ڤێ بنەمایێ، باوەریپێکرنا ب زاڕۆکی و پشكداریپێکرنا ڕۆژانە د ژیانا وی یا خواندنێ دا، کلیلا سەرکەفتنێ یا هەردەمە.

کۆمێنتا تە