ژ بەر بارانێن زۆر مەترسی ل سەر سكرەكێ ئاڤێ ل ئامێدیێ هەیە
ئامێدیێ، مەحمود نهێلی
ژ ئەنجامێ بارانێن زۆر و دروست بوونا لەهیان زیان گەهشتینە سكرەكی ئاڤێ و مەترسیا پەقینێ ل سەر هەیە. هەروەسا لەهیان زیان ب چەند جادە و پرێن وێ دەڤەرێ ژی گەهشتینە.
بۆتان ئامێدی بەرپرسێ ئاڤدێریا ئامێدیێ بۆ رۆژناما ئەڤرۆ دیار كر، ئەو بارانێن زۆرێن ڤێ دووماهیێ زیان گەهاندینە كەرتێ ئاڤدێریێ ژی و ل نێزێك رووبارێ سپنە مەترسیا پەقینا سكرەكی ئاڤێ هەیە و هەكە ب پەقیت دێ زیانێن زۆر لێ پەیدا بن، ب تایبەت د وارێ چاندنێ دا.
بەرپرسێ ئاڤدێریا ئامێدیێ زێدەتر گۆت: ئەڤ سكرە دكەڤیتە سەر رێیا گوندێ دێرەشێ ل نێزیك گوندێ كوانێ و دورێن 320 هزار میترێن سێ جاری یێن ئاڤێ تێدا هەنە و گرەكێ ئاخێ رەخ سكری ڤە یێ هریایی و هەكە باران بەردەوام بن و چێدبیت ئەڤ گرە پتر ب هەرفیت و ل وی دەمی دێ سكر ژی پەقیت.
دیار كر، ئاڤا ڤی سكری ئێكسەر دێ چیتە سەر رووبارێ سپنە و دێ زیانێن زۆر گەهینتە هەر تشتەكی دەوروبەرێن سپنەی.
ناڤهاتی دیار ژی كر، ژ بەر كو قوفلا ڤی سكری یا ئاسێ بووی و ناهێتە ڤەكرن و هەروەسا چ جهێن دی نینن رێ رەورەوێ ئاڤێ بگۆهورن، ژ بەر وێ یەكی چ چارەسەریێن زانستی نینن.
ناڤهاتی داخواز ژ خەلكێ دەوروبەرێن سپنەی ژی كر، هایدار بن و بەرهەڤییچن خوە وەرگرن، ب تایبەت ئەو كەسێن بیستان ل رەخێن سپنەی هەی یان ژی پرۆژە و جهێن خودانكرنا ئاژەلی ل نێزك سپنەی هەبن و گۆت: هەكە ئەڤ سكرە ب پەقیت ئاڤا وێ نێزیك 45 خۆلەكان دێ گەهیتە سەنتەرێ ناوچەداریا دێرەلۆكێ.
دیار كر، هندەك كافی و جهێن گۆزاری و مالێن نیزێك سپنە هاتینە هایداركرن كو د هشیار بن دا زیانێن پتر نەگەهنێ.
هێژا عەبدولواحد رێڤەبەرێ ئاڤدێریێ ل پارێزگەها دهوكێ بۆ رۆژناما ئەڤرۆ دیار كر، پشتی ئەو هاتینە ئاگەهداركرن مەترسیا پەقینا سكرەكێ ئاڤێ ل دەڤەرا ئامێدیێ هەیە وان وەك تیما ئاڤدێریا دهوكێ سەرەدانا جهی سكری كریە و گۆت: ئەگەرێن پەقینا سكری ڤەدگەرن بۆ هندێ كو ژ ئەنجامێ بارانێن زۆر د دەمەكێ كێم دا گرەكی ئاخێ هریایە و خشیایە ناڤ سكری.
و دیار كر، نوكە چ رێیێن زانستی نین بو چارەسەكرنا ڤێ ئاریشێ و گۆت: ژ بۆ كێمكرنا مەترسیا هەرفینێ و كێمكرنا زیانێن وێ ب تنێ مە رێكا كێشانا ئاڤا سكری گرتیە بەر ب رێكا دو بوریێن هەشت ئینج و رێ گرتنێ ل هاتنا ئاڤێ بۆ ناڤ سكری. دیار كر، ئەڤ رێكە دێ مەترسیا هەرفینێ و مەترسیا زیانێن وی سكری تا رادەیەكێ كێم كەت.
ژلایەكێ دیڤە ژ ئەنجامێن بارانێن زۆر و لەهیان زیان گەهشتیە چەندین پر و جادەیێن دەڤەرێ و هند جادە داچوینە و مەترسیا ژ ناڤچونێ ل سەر هەیە.
