کاروانەکێ دی یێ چەکێ ئەمریکا گەھشتە رۆژئاڤایێ کوردستانێ
ئه‌ڤرۆ نيوز:
دوھی رۆژناما تەرەف تورکیا د راپۆرتەکێ دا بەلاڤ کر کو ئەمریکا ب رێیا ئەردی 200 تەن چەک گەھاندیە رۆژئاڤایێ کوردستانێ و ژ بلی یەکینەیێن پاراستنا گەل ھندەک گرۆپێن دی ژی چەک وەرگرتینە و ئارمانجا ئەمریکا ژی ب ھێزکرنا وان ھێزانە یێن کو نھا ل رۆژئاڤایێ کوردستانێ شەرێ داعشێ دکەن و بەرپرسێن ئەمریکی سۆز داینە ھەتا داعش ژناڤ نەچیت ئەو دێ بەردەوام چەکی رەوانەی رۆژئاڤایێ کوردستانێ بکەن.
پشتی رۆژناما تەرەف یا تورکیا گەلەک دەزگەھێن دی یێن راگەھاندنا جیھانێ ژی بەلاڤ کرن کو ئەمریکا ڤێجارێ ب رێیا ئەردی چەک بریە رۆژئاڤایێ کوردستانێ و پشتی ڤان راپۆرتان دوھی مارک تونەر پەیڤدارێ وەزارەتا دەرڤە یا ئەمریکا د پرێس کۆنفرانسەکێ دا راگەھاند کو ھەفتیا بۆری بۆ جارا دویێ ئەمریکا کاروانەک چەک گەھاندیە رۆژئاڤایێ کوردستانێ و گۆت: (ئەو چەک تنێ بۆ یەکینەیێن پاراستنا گەل ناچن، بەلکو ئەم وان چەکان ددەینە وان ھێز و گرۆپان کو نھا ل سووریایێ شەرێ داعشێ دکەن و دێ ھاریکاریا مە بۆ وان یا بەردەوام بیت و دڤێت ھەموو ئالیەک ژی بزانیت کو داعش بزاڤێ دکەت چالاکیێن تیرۆرستی ل ئورۆپا و وەلاتێن دی زێدە بکەت و ژ بەر ھندێ ژی دڤێت ئەم ھاریکاریا وان ھێزان بکەین کو ب رێیا ئەردی شەرێ داعشێ دکەن).
ل دۆر پرسیارەکێ کو ئەمریکا بەری نھا دیار کربوو ئەو ئێدی ھاریکاریا یەکینەیێن پاراستنا گەل ل رۆئاڤایێ کوردستانێ ناکەن پەیڤدارێ وەزارەتا دەرڤە یا ئەمریکا راگەھاند کو ئەو ھاریکاری تنێ بۆ وان نەبوویە، بەلکو گەلەک ھێزێن دی نھا ل سووریا و رۆژئاڤایێ کوردستانێ ھەنە کو شەرێ داعشێ دکەن و پێدڤیا وان ب چەکی ھەیە و ئەم ژی دێ ھاریکاریا وان بکەین و گۆت: (دڤێت ھەموو ئالیەک بزانیت کو ھەکە نھا ئەم رێگریێ ل داعشێ نەکەین دێ پاشی مەترسیا وێ ل سەر جیھانێ زێدە بیت و ژ بەر ھندێ ژی دڤێت ئەم ھاریکاریا ھەر ھێزەکێ بکەین کو شەرێ داعشێ دکەت).
سەبارەت ب ھەلویستێ تورکیا ژی ناڤھاتی دیار کر کو دەمەکە بەرپرسێن تورکیا دیار دکەن کو ھەلویستێ وان ژی ل ھەمبەر داعشێ ھاتیە گوھۆرین و ئەو ژی بەرھەڤن شەرێ داعشێ بکەن، چونکو داعش مەترسیەکا مەزنە ل سەر پاشەرۆژا تورکیا ژی و د دەمەکێ وەسا دا دڤێت تورکیا ژی پشتەڤانیێ ل بزاڤێن مە و یێن ھەر ئالیەکێ بکەت کو دخوازیت داعشێ ژناڤ ببەت.
ل ئالیێ دی چاڤدێرێن سیاسی دیار دکەن کو ئەمریکا باش دزانیت تنێ ھێزێن کوردی ل عیراقێ و سووریایێ شەرێ داعشێ دکەن و ژ بەر ژی ئەمریکا دێ بەردەوام ھاریکاریا وان بکەت، چونکو دو سال بەری نھا ئەمریکا دخواست ھێزەکا چەکداری یا میانرەو ل سووریێ بەرھەڤ بکەت لێ ئەو ھێز پاشی گەھشتنە گرۆپێن ھشکباوەر و ژ بلی کوردان باوەریا ئەمریکا ب چو ھێزەکا دی ل سووریایێ ناھێت.
