گه‌فێن ڤه‌گه‌ڕاندنێ ل سه‌ر په‌نابه‌رێن هه‌رێمێ هه‌نه
هه‌ولێر، قائید میرۆ:
نوونه‌رێ حوكمه‌تا هه‌رێما كوردستانێ ل ئورۆپا ئاشكرا كر، مه‌ترسیا ڤه‌گه‌ڕاندنێ ل سه‌ر ب هزاران په‌نابه‌رێن كورد ل ده‌رڤه هه‌یه و دبێژیت: حوكمه‌تا هه‌رێما كوردستانێ ل گه‌ل ڤه‌گه‌ڕاندنا ب زۆری نینه.
دلاوه‌ر ئاژگه‌یی، نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپا بۆ رۆژناما ئه‌ڤرۆ دیار كر، ژ لایێ وه‌لاتێن ئورۆپا گڤاشتنێن زۆر ل سه‌ر هه‌ردو حوكمه‌تێن ئیراقێ و هه‌رێما كوردستانێ هه‌نه بۆ ڤه‌گه‌ڕاندنا په‌نابه‌رێن ئیراقێ و هه‌رێما كوردستانێ و گۆت: “چه‌ندین جاران داخواز هاتیه كرن، كو حوكمه‌تا هه‌رێما كوردستانێ رازیبوونا خوه دیار بكه‌ت بۆ ڤه‌گه‌ڕاندنا په‌نابه‌ران ب زۆری، به‌لێ سیاسه‌تا هه‌رێمێ یا دیاره ل گه‌ل ڤه‌گه‌ڕاندنا په‌نابه‌ران ب زۆری نینه”.
دلاوه‌ر ئاژگه‌یی گۆتژی: “قانوونێن وه‌لاتان بۆ رێگریێ ل په‌نابه‌ران دژوار بووینه و نوكه وه‌ك به‌رێ مافێ په‌نابه‌ریێ ب خه‌لكێ بیانی ناده‌ن، ئه‌ڤه ژی بوویه ئه‌گه‌ر ژیانا په‌نابه‌ران دژوار ببیت، گه‌فێن ڤه‌گه‌ڕاندنێ ل سه‌ر هه‌ژماره‌كا به‌رچاڤ یا په‌نابه‌ران هه‌نه و بزاڤان دكه‌ن ب زۆری ڤه‌گه‌ڕینن، ئه‌م ژی ل گه‌ل ڤه‌گه‌ڕاندنا ب زۆر نینین، هه‌رچه‌نده هنده‌ك پرۆپاگنده دهێنه كرن، كو حوكمه‌تا هه‌رێمێ ل گه‌ل ڤه‌گه‌ڕاندنا په‌نابه‌رانه، به‌لێ چو راستی بۆ نینه و ئه‌م ل گه‌لڤه‌گه‌ڕاندنا ب زۆری نینین”.
