ھەیڤا بھێت 25 کۆمپانی دێ ژ بەر کیمیابارانکرنا ھەلەبجە ھێنە دادگەھکرن
ئه‌ڤرۆ نيوز:
بڕیارە ل ھەیڤا بھێت 25 کۆمپانی و کەسێن بیانی ژ بەر ھاریکاریکرنا رژێما بەعسا ژناڤچووی ل پارێزگەھا ھەلەبجە بھێنە دادگەھکرن و پارێزەرەکی ژی دیار کر کو پێدڤیە ھاریکارێن رژێما بەعس بھێنە سزادان و قەرەبوویا خەلکێ ھەلەبجە بکەن.
ئەیاد کاکەیی، پارێزەرێ کەیسا ھەلەبجە بۆ رۆژناما ئەڤرۆ دیار کر کو بڕیارە ل رۆژا 27ی ھەیڤا بھێت ھژمارەکا کۆمپانی و کەسان ژ بەر تاوانا کیمیابارانکرنا ھەلەبجە ل باژێڕێ ھەلەبجە بھێنە دادگەھکرن و بۆ ڤێ مەرەمێ لیژنا بەڕەڤانیکرنێ چەندین بەلگە ل سەر ئەڤان کۆمپانی و کەسێن جیھانی کۆمکرینە و داینە دادگەھێ کو ل سەردەمێ رژێما بەعس ھاریکاریا رژێما بەعس کریە بۆ کارەساتا کیمیا بارانکرنا ھەلەبجە یا کو تێدا پێنج ھزار وەلاتیێن سڤیل بووینە قوربانی و گۆت: “نوکە ئەم یێ بەرھەڤیان دکەین بۆ گازیکرنا تۆمەتباران”.
ناڤھاتی خویا کر کو وان سکالا ل سەر 25 کۆمپانی و کەسان تۆمارکریە و ب رێیا نوونەراتیا حوکمەتا ھەرێما کوردستانێ فەرمانا دادگەھێ بۆ ھەموو لایەنێن تۆمەتبار ھاتیە ھنارتن، داکو ل رۆژا دیارکری بەرھەڤی دادگەھێ بن، چونکی ئەڤان کۆمپانی و کەسێن سکالا ل سەر ھەی چەکێ قەدەغەکری دایە رژێما بەعس و پێدڤیە بھێنە سزادان و گۆت: “ئەڤ کۆمپانیێن تۆمەتبار ژی ل چەندین وەلاتێن جودانە و نوکە ئەم یێ ل عەمانا پایتەختێ ئوردن بۆ کۆمکرنا بەلگەیێن دروست، چونکی کەیسا ھەلەبجە ل سەر ئاستێ نێڤدەولەتی ب جینۆساید ھاتیە قەبوولکرن”.
