(سەرهاتییەک ژ ئەنفالێن خویناوی)
خورشید تەوفیق باکۆزی
ئێڤارە و مژا ترسێ شاپەڕێن خوە یێ ب سەرهەمی دەڤەرێ دا گرتی. مرۆڤ یێ دناڤ گێژەڤانکا دەروونێ خۆدا دنالن، کەسەک چ ژچارەنڤیسا خۆ نزانیت. مەزن و گرگرێن گوندێ (ناڤشکێ) یێن تێک دئێن و تێک دچن؛ کانێ دێ چ رێک بینن.
مامێ عەبدوللا کەسەکێ دانعەمرە و گۆپالەکێ د دەستا دا هەریێ دنژیت و دهەرێفیت، پاشی گۆت: «ما هەکو ئەم بچینە چیایێ سپی د وان گەلییان دا ل شکەفتا (براهیم قەرا) بۆ ماوەیەکی خۆ ب پارێزین دێ چەوابیت؟».
نەڤیێ وی فاروقێ گەنج بەرسڤا وی دا و گۆتێ: «باپیر ماتە گول دەنگێ قومبەلا نە بوو ل گوندێ (برجینی) و گوندێ (تویکا)، چەوا دویکێلا سپی ژێ رادبوو، نهو نەوەکی دەمێ بەرێ یە، ئەڤە قومبەلێن کێمیاوینە. دوکێلا وێ دگەل بای بەلاڤەدبیت، ئێدی ئەم ل گەلی و شکەفتان ڤە ژی نائێینە پاراستن».
دگەل هندێ بابێ وی براهیمی ئاخینکەک راهێلا و گۆتی: «بابۆ ئەڤە ئەنفالە، ئەڤە فەرمانە و قڕکرنا مە کوردانە، ڤێجا تو رابە دایکا خوە و خوشک و برایێن خوە و زارۆکێن برایێ خوە زاهری بکە د تەرەکتۆرێ دا و ببە و هەڕە وەغەرا هەوە یاخێرێ بیت. ئەز دونیایێ نابینم و باپیرێ تە یێ عەبدوللا ژی نەشێت بێت. تو مە هەردوکان بهێلە مە ژیێ خۆ یێ بۆراندی، تو هەرە و زارۆکان قوڕتالکە».
فاروقی ب کەلە گڕیڤە گۆت: «باب، تو چ دبێژی؟ دێ چەوا هەوە هێلم». هەمی پێکڤە چوونە د تەرەکتۆرێ دا و دگەل گوندیان بەرەف سنوورێ تورکیا ڤە چوون. هندی رێکا تەرەکتۆرێ هەی چوون، پاشی هاتنە خوارێ و هێدی هێدی ب پێیان کەفتنە رێکەکا بێ وەغەر، هەموو رێک ل بەر فارۆقی یێن هندابووین و گەلەک یێ شەپرزە بووی، یێ زارۆکان دگەهینیتە جهەکی و جارەکا دی یێ دزڤڕیت و بابێ خوە یێ حافز و نابین دکەتە پشتا خۆ، هەتا وی دگەهینیت… جارەکا دی دزڤڕیتە باپیرێ خۆ دکەتە پشتا خۆ.
خەلک هەمی گەلەک یێ شەپرزە بووی، هندەک یێ دئێنە خوارێ دا خۆ ڕادەستی دوژمنی بکەن و هندەک ژی یێ سەر ئەڤراز بەرەف سنووران دچن. د وان چرکاندا ل «گەلیێ دیهێ» فرۆکێن ڕژێمێ گەهشتنە هنداڤ سەرێ وان و سیبەر ل ئەردی دکرن، ب ئاماژان گۆتە خەلکی: «بزڤڕن». ل وێرێ ئەو خەلک ڕاوەستاندن تاکو لەشکرێ فاشست گەهشتییە وان. ئەو خەلکێ ل وێرێ پێکڤە کەتنە دەستێ دوژمنی و ل «ئیڤا»یێن لەشکری سویارکرن و بەرەف کەلا زۆلمێ «کەلا نزارکێ» برن.
د کەلێ دا، زارەزارا بچویکا و هاوار و گریا ژنکان ئەرد و ئاسمانان دهەژینن، دێ بێژی رۆژا حەشرێ یە و رۆژ یا ژ کەرخا خۆ دەرکەفتی و یا هاتییە خوارێ. ل دەمەکی ڕەشەکەکێ ئەمنا ڕژێمێ هات کو ئەو بخۆ کورد بوو خەلکێ دەڤەرێ بوو، ئێک ئێکە ناڤێن پێشمەرگەی دخواندن، جارەکێ گۆت:
«فاروق ئیبراهیم عەبدوللا». فاروقی ژی گۆتێ: «بەلێ». ب زمانێ عەرەبی گۆتێ «مخرب ابن المخرب، گلعوا هژا المجرم». ئێلچی و سیخوڕێن خوینرێژێن ئەمنێ وەکی گوران پێوەرهاتن و ب شەق و پێن و لێدانێ ژ ناڤ خەلکی دەرئێخست، هندی ژنکا خوە تێوەردکر ژی لێ ل دوماهییێ ژنک ژی دانە بەر گۆپالا.
ئینا مامێ عەبدوللا ب دەنگەکێ بلند گازیکرە ئەوی سیخوڕێ کورد، ناڤێ وی ئینا و گۆتێ: «تو کوردی و یێ نیاسی و خەلکێ دەڤەرێی، ماتە وژدان نینە و تو شەرم ناکەی تو ددەینییە ژن و زارۆکان، ما ئەڤە هوین دێ چ ب سەرێ مە ئینن؟!».
ئەو سیخۆڕێ بێ وژدان ژ کەرب و کین و وەکو کەسەکێ کامسۆتی قەستا مام عەبدوللای کر و دا بەر گۆپالێن حەیزانی. کچا وی خۆ دهاڤێژیتە سەر کەلەخێ وی، ئەوێ ژی ددەتە بەر گۆپالا. مامێ عەبدوللایێ پیرەمێر و دانعەمر دکەڤیت و دناڤ خوین و برینێن خۆدا بێ هۆش دمینیت، پاشی ژبەر ئازار و ئەشکەنجا دژوار و برینێن لەشێ خۆ گیانێ خو ژدەست ددەت و دگەهیتە کاروانێ سەروەران.
فاروقی ژی دگەل چەندین پێشمەرگە و قارەمانێن دی دبەنە د ژۆرەکێ دا و ب بلۆکان شەهید دکەن و گیانێ وان بەرەف ئاسمانێ ئازادییێ دفریت. پشتی چەند سالەکان هندەک ژوان ڕەشەکێن مرۆڤکوژ و خوینرێژ ژی، دگەهنە سزایێن گەل و دچنە دناڤ زبلدانکا دیرۆکێ دا.
- مفا ژ ئەکاوەنتێ – وەلید ئەردی هاتییە وەرگرتن…
