سالح موسلم هاتە ئازاد كرن
ئەڤرۆ نیوز ، زنار تۆڤی :
سه‌ره‌رای هندێ کو توركیا داخوازا وی دكر،لێ ئه‌ڤرۆ دادگەها وەلاتێ چیك بریارا ئازادكرنا سالح موسلمی سه‌رۆكێ بەرێ یێ په‌یه‌دێ ده‌ركر.
لدووڤ نووچەیەکێ سكاى نیوز،بەری دەمەکێ بریارا ئازادکرنا سالح موسلمی ژلایێ دادگەها چیك ڤە ده‌رچوو،پشتی کو دوو رۆژان ژلایێ ده‌ستهەلاتدارێن وی وەلاتی ڤە هاتیە گرتن.
ل رۆژا ئێكشه‌مبیا بوری سالح موسلم هەڤسه‌رۆكێ بەرێ یێ په‌یه‌دێ ژ لایێ ده‌ستهەلاتدارێن پراگ ڤە هاتە گرتن، ئاژانسا ئا‌نادۆل ئاشکراکربوو،کو هه‌ر ل گه‌ل گرتنا سالح موسلمی ژلایێ چیك ڤه، توركیا داخواز ژ دادگەها چیك كر،کو وی رادەستی تورکیا بكەن،وان كه‌یس بۆ موسلمی ئاماده دكر،بەلێ ئه‌ڤرۆ سێشه‌مبی به‌رۆڤاژی پێشبینیێن توركیا سالح موسلم هاتە ئازاد كرن.
سالح موسلم ل سالا 1951 ل باژێرێ كۆبانێ یێ رۆژئاڤایێ كوردستانێ ژ دایك بوویه، ل 1970 هەتا 1977 ل ئیسته‌نبولێ ژیایە و د وارێ ئه‌ندازیاری دا خواندیە.
