فلمه‌كێ كوردى خه‌لاتێ هیومه‌ن رایتس وه‌رگرت
ئەڤرۆ نیوز ، زنار تۆڤی :
فلمێ دکیۆمێنتاری یێ كوردى مین هه‌لگر کو ل دۆر ژیانا پێشمه‌رگه‌کێ هاتیە چێکرن، خه‌لاتێ سالا 2018 یێ هیۆمه‌ن رایتس وه‌رگرت و ب باشترین فلم هاته خه‌لاتكرن.
شینوار كه‌مال ده‌رهێنه‌رێ فلمێ (مین هه‌لگر)، بۆ ئەڤرۆ نیوز دیاركر،کو فلمێ مین هەلگر ل سه‌ر ژیانا پێشمەرگەرکێ پەککەفتی عه‌قید فاخر به‌روارى هاتیە چێكرن و ب ڤی فلمی مە پشکداری د خۆلا 10 یا فیسته‌ڤالا هیۆمه‌ن رایتس بۆ سالا 2018 ل وه‌لاتێ نه‌رویژ کریە و ئەم شیاین خه‌لاتێ باشترین فلمێ دکیۆمێنتاری ب ده‌ستخۆڤه بینین.
هەروەسا گوت ژی،ئه‌ڤ فلمه ژ ده‌رهێنانا من و هۆگر هرۆرى یە و فلمه‌كێ دیكۆمێنتارى بوویه و ل سالا 2017 فلمێ مه خه‌لاتێ تایبه‌ت یێ ژووریا فلمێن درێژ یا فیسته‌ڤالا ئه‌مستردام یا فلمێن دیكۆمێنتاری وه‌رگرت كو مه‌زنترین فیسته‌ڤالا فلمێن دیكۆمێنتاری یه ل جیهانێ، ئه‌ڤ فلمە ل سەر قارەمانەکێ كورد عەقید فاخر به‌رواری هاتیە چێکرن،کو ئه‌و زه‌لامێ ب پیه‌كی و كه‌ته‌ره‌كی ب هزاران مرۆڤ قورتال كرین و مین و تەقەمەنی راکرین.
شینوار كه‌مالی ئەو ژی دیاركریە،کو عه‌قید فاخر به‌روارى یێ كێم ئه‌ندام كو ب تنێ ب پیه‌كى بوو،د ئەرکێ راکرنا مینان دا ل سه‌ر ده‌ستێ تیرۆرستێن داعش ل سالا 2016 هاتیە شه‌هیدكرن، قاره‌مانێ ڤى فلمێ دیكۆمێنتارى یه و ئه‌ڤ فلمه به‌حسێ قاره‌مانى و ئازایه‌تیا وی عه‌قیدی دكه‌ت، وه‌ك پێشمه‌رگه‌یه‌ك گیانێ خوه دئێخیته د مه‌ترسیێ دا و مین و ته‌قه‌مه‌نیان ل سەنگەرێن شه‌رى رادكه‌ت، ب مه‌ره‌ما هندێ کو هه‌ڤالێن خوه یێن پێشمەرگە ژ مرنێ رزگار بكه‌ت و دیسا عه‌قید فاخر چه‌ندین جاران ژ مرنێ رزگار دبیت و پێیه‌كێ خوه ژى ژ ده‌ست دده‌ت و ل دوماهیێ شەهید دبیت.
