پارێزگه‌رێ هه‌ولێرێ ب فه‌رمى داخوازا لێبۆرينێ ژ مامۆستايه‌كى كر
ئه‌ڤرۆنيوز:
پارێزگه‌رێ هه‌ولێرێ ب فه‌رمى داخوازا لێبۆرينێ ژ مامۆستاى كر كو دتۆماره‌كا ڤيديۆيى دا ده‌ردكه‌ڤيت وژئاليێ دو كه‌سان ڤه دهێته قوتان، هه‌ڤده‌م دووپات دكه‌ت كو پێرابوونێن قانوونێ بۆ سزادانا وان هه‌ردو كه‌سان هێنه ئه‌نجامدان.
پارێزگه‌ها هه‌ولێرێ دبه‌ياننامه‌كێ دا به‌لاڤكر” پشتى به‌لاڤبوونا وێ تۆمارا ڤيديۆيى يا هێرشا دو كه‌سان ل سه‌ر مامۆستايه‌كێ هه‌ولێرێ د خوه‌پيشاندانێن رۆژێن بۆرى، كو ئه‌و چه‌نده بوويه جهێ دلگرانيا هه‌موو ته‌خێن جڤاكى ل به‌رامبه‌ر وێ ره‌فتارێ”.
د به‌يانناما پارێزگه‌ها هه‌ولێرێ دا هاتيه” پارێزگه‌رێ هه‌ولێرێ دبزاڤا وێ چه‌ندێ دابوو و ب ئه‌ركێ خوه زانيه بچيته ده‌ف وى مامۆستاى وب ناڤێ پارێزگه‌ها هه‌ولێرێ داخوازا لێبۆرينێ ژێ بكه‌ت”.
ئاماژه دا ژى” ئه‌ڤرۆ دوور ژ چاڤێن كاميرا وده‌زگه‌هێن راگه‌هاندنێ، ئه‌و مامۆستايێ به‌رێز ل گه‌ل رێڤه‌به‌رێ قوتابخانا خوه هاتنه ديوانا پارێزگه‌ها هه‌ولێرێ وسه‌ره‌دانا پارێزگه‌رێ هه‌ولێرێ كر”.
نه‌وزاد هادى، پاريزگه‌رێ هه‌ولێرێ، زێده‌بارى ئيدانه‌كرنا توند يا وێ ره‌فتارا دژى وى مامۆستاى هاتيه كرن، ده‌ستخوه‌شى ل خزمه‌ت ولێبۆرينا وى مامۆستاى كر وب نموونێ بلند يێ كه‌سايه‌تيه‌كا په‌روه‌رده‌كار ودلسوزێ گه‌ل ونيشتمانى هژمارت وسوز دايێ كو هه‌موو پێرابوونێن قانوونى ژئاليێ ده‌زگه‌هێن په‌يوه‌نديدار بۆ سزادانا وان دو كه‌سان بهێنه وه‌رگرتن.
به‌يانناما پارێزگه‌ها هه‌ولێرێ دياركر كو وى مامۆستاى دووپاتى ل وێ چه‌ندێ كر كو ئه‌و ره‌فتاره ژ مه‌زناهيا مامۆستايان كێم ناكه‌ت ورێگر نابيت ل به‌رده‌وامبوونا وان ل سه‌ر خزمه‌ت وپه‌روه‌رده‌كرنێ وپێگه‌هاندنا نه‌ڤيێ نوو.