بەیار دۆسکی : دەنگدان ب لیستا 184 تەمامکەرا شەرێ پردێ و مەحمودیێ یە
ئەڤرۆ نيوز، نیوار محەمەد سەلیم:
کاندیدێ ژمارە 4 یێ پارتی دیموکراتی کوردستان و لیستا 184 راگەھاند کو ھەکە پێگەھێ پارتی ل بەغدا یێ ب ھێز بیت، پێگەھێ کوردان دێ یێ ب ھێزبیت و ئاشکەرا ژی کر کو دەنگدان ب لیستا 184 تەمامکەرا شەرێ پردێ و مەحمودیێ یە.
بەیار دۆسکی کاندیدێ ژمارە 4 یێ پارتی دیموکراتی کوردستان و لیستا 184 د دیدارەکێ دا بۆ رۆژناما ئەڤرۆ دیارکر کو ئەو ل گە ھندێ نینە خوە ژ بەغدا ڤەکێشن و گۆت: “ھەکە پرۆژەکێ سەربەخوەبوونێ ژی مە ھەبیت، پێدڤیە مە پرۆژەکێ باش ل بەغدا ھەبیت، دا کو ڤان دەستکەفتان ب پارێزین”.
زێدەتر گۆت: “دەستکەفتێن باش یێن د دستووری دا ھەین، دڤێت کار ل سەر بجھئینانا دستووری بکەین، ھەکە ھندەک لایەنا گازندە ژی ل سەر ریفراندۆمێ ھەبن، بەلێ نامەکا ب ھێز بوو بۆ وان وەلاتێن ب ھێز کو کێشا کوردی نابیت ب ڤی رەنگی بیت، نابیت حوکمەت مافێ مە پشت گوھـ ب ھاڤژیت، ژ بەر ھندێ ژی وەلاتێن ب ھێز ژی دێ کار بۆ ب جھئینانا دستووری کەن”.
بەیار دۆسکی ئاشکەرا ژی کر کو ئەڤ قەیرانێن ھەرێما کوردستانێ دەرئەنجامێ سیاسەتێن بەغدا بووینە و ب جھنەئینانا دستووری ب رەنگەکێ دروست ژ بەر ھندێ حوکمەتا ھەرێما کوردستانێ ژی سیاسەتەکا دی ھەبوو کو ل گەل عیراقێ ب رێڤە ناچیت یان مافێن ھەرێمێ نادەت.
نەڤەشارت ژی کو ھەکە دستوور ب دروستاھی بھێتە بجھئینان ئەڤ ئاریشێن دارایی یێن ھەرێما کوردستانێ نامینن. “یا ل سەر مە ئەوە دستوور بھێتە ب جھئینان دا کو ئەڤ قەیرانە نەمینن”، بەیار دۆسکی گۆت.
دەربارەی دانا دیتنەکا دروست ب نوونەرێن کوردی ژ لایێ سەرکرداتیا کوردی ڤە، کاندیدێ ژمارە 4 یێ پارتی دیموکراتی کوردستان و لیستا 184، گۆت: “گازندا بەردەوام ئەز ژ دەستەلاتا سیاسی دکەم ئەوە کو دیتنەکا دروست نادەنە پەرلەمانتارێن خوە ئەوێن دچنە بەغدا، ھەکە پەرلەمانتاری دیتنەکا سیاسی نەبیت نوزانیت کا کارێ وی ل بەغدا چیە، ژ بەر ھندێ ژی دڤێت سەرکرداتیا سیاسی دیتنەکا سیاسی بدەتە پەرلەمانتاران دا ب دروستی کارێ خوە ئەنجام بدەن”.
دەربارەی رۆلێ پەرلەمانتاری گۆت: “گەلەک جاران جاددە ژی د رۆلێ پەرلەمانتاری ناگەھیت، کارێ پەرلەمانتاری ئەو نینە بچیت جاددەکێ قێر کەت یان ژی خزمەتەکا ئێکسەر بکەت، کارێ باژێرڤانیێ و دەستەلاتا بجھئینانێ یە، کارێ پەرلەمانتاری دانانا قانوونا و چاڤدێریا حوکمەتێ یە. ئانکو وەلاتی ب رەنگەکێ نەیێ ئێکسەر مفایی ژ خزمەتێن پەرلەمانتاری دبینیت”.
ئازادی گرنگترە یان نان و ئاڤ، ل دۆر ڤێ چەندێ بەیار دۆسکی گۆت: “مللەت ب دو تشتان دژین؛ ئازدی و کەرامەت. ھەکە ئەڤ ھەردو تشتە نەبن ژیانێ چو بھا نابن. ژ بەر ھندێ ژی ھەکە بۆ نانی خوە کێم کەین بۆ نوکە و پاشەرۆژێ گەلەک یا خرابە”.
گۆتژی: “ئازادی و کەرامەت ژ نان و ئاڤا ب بھاترە، ل سەر دەمێ عەبدینیێ ژی نان و ئاڤ ھەبوون، بەلێ ئازادی نەبوو، ژ بەر ھندێ ژی دڤێت ب ئازادی و کەرامەت بژین، دێ نانەک ھەر ھەبیت بخۆین.
ل دۆر وێ چەندێ کا چەند یا گرنگە دەنگ ب پارتی بدەنن دا زانین کو دەنگدان ب لیستا 184 تەمامکەرا شەرێ پردێ و مەحمودیێ یە و گۆت: “پێگەھێ پارتی ل بەغدا یێ لاواز بیت، دێ پێگەھێ کوردان ژی ل بەغدا یێ لاواز بیت. دەنگدان بۆ لیستا 184 داکوکیکرنە ژ مافێن کوردان و پشتەڤانیکرنا ریفراندۆمێ یە”.
ل دووماھیێ ژی گۆت: “ھەموو مللەت د ئاریشان دا دەرباز دبن، بەلێ دڤێت کار بکەن بنایتێ وێ ئاریشێ ب گوھۆڕن و ب رەنگەکێ دی کار بکەن و ئومێدەکا دی دروست بکەن، ژ بەر ھندێ ژی دڤێت مە ھیڤیێن نوو و ئۆمێدێن نوو ھەبن”.
