چارەنڤیسێ ئەردۆگانی د دەستێ ھەدەپێ دایە
ئه‌ڤرۆ نيوز:
ل گۆر راپرسیێن ھەتا نھا ژ بۆ سەرۆکاتیا تورکیا ھاتینە کرن دیار دبیت کو دەنگێ ئەردۆگانی و بەربژارێ ئۆپۆزسیۆنا تورکیا موحرەم ئینجە ھەر دو ژی وەکو ئێکن و ٣٧% دەنگێن وەلاتیان بدەستڤە دئینن و دەنگێ دەمیرتاش نوونەرێ ھەدەپێ بۆ پۆستێ سەرۆکاتیا تورکیا ژی دبیتە ١٠% و ھەکە ھەدەپە پشتەڤانیێ ل بەربژارێ ھەڤپەیمانیا مللەت بکەت دێ دەنگێ موحرەم ئینجە ببیتە ٤٧% و دێ بیتە سەرۆک کۆمارێ تورکیا.
پارتیا کۆماریا گەل ل گەل ئیی پارتی و چەند پارتێن دی بەری نھا ھەڤپەیمانیا مللەت ل دژی ئەردۆگانی و پارتیا نەتەوەپەرست ئاڤا کرن، گەلەک ئالیێن سیاسی یێن چەپ و دیموکراسیخوازێن تورک داخواز ژ پارتیا کۆماری کربوون کو ل گەل ھەدەپێ ژی ھەڤپەیمانیێ دروست بکەن، لێ پارتیا کۆماری ب بەھانا پەیوەندیێن ھەدەپێ ل گەل پەکەکێ خوە ژ ھەڤپەیمانیەکا وەسا دوور کر، لێ نھا راپرسیێن ل تورکیا دھێنە کرن نیشا ددەن کو قەدەرا سەرۆکاتیا تورکیا د دەستێ ھەدەپێ دایە و ھەکە ھەدەپە پشتەڤانیێ ل ئالیەکێ ل دژی ئالیێ دی بکەت دێ بێ ھەڤرک سەرکەڤیت.
چاڤدێرێن سیاسی ژی دیار دکەن کو ھەدەپە ب چو رەنگەکێ پشتەڤانیێ ل موحرەم ئینجە یان ژی ئەردۆگانی ناکەت و دێ دەمیرتاش بەربژارێ وان بیت، چونکو داخوازیێن ھەدەپێ ژ ھەر دو ئالیان جودا نە و کورد ژی ل تورکیا رازی نینن کو پشتەڤانیێ ژ چو بەربژێرێن دی ژ بلی دەمیرتاشی بکەن، چونکو ھەم بەربژارێ ھەڤپەیمانیا مللەت و ھەم ژی ئەردۆگان چەندین سالن دژبەریا مافێ کوردان دکەن و کورد ژی ب چو رەنگەکێ رازی نینین ئێدی پشتەڤانیێ ل کەسێن وەسا بکەن.
ل ئالیێ دی بەری نھا موحرەم ئینجە دیار کربوو کو دڤێت سەلاحەدین دەمیرتاش بەربژارێ ھەدەپێ بۆ پۆستێ سەرۆکاتیا تورکیا بھێتە ئازادکرن دا ئەو ژی بشێت وەکو بەربژارێن دی ل دەرڤە و ب رەنگەکێ ئازاد پشکداریێ د بانگەشا ھەلبژارتنان دا بکەت، ھەروەسا پارێزەرێ دەمیرتاشی ژی دیار کربوو کو ڤان داخواز ژ دادگەھا بلند یا تورکیا کرینە کو دەمیرتاشی ئازاد بکەن، لێ ھەتا نھا ژی دیار نینە کا دێ بریارا دادگەھا تورکیا چ بیت، چونکو نھا ل تورکیا دادگەە سەربخوە نینن و سەر ب حوکمەتێ نینە و بێی رزامەندیا ئەردۆگانی ژی ئەو نەشێن چو بریارەکا وەسا بدەن.