نوشداره‌ك هاته ره‌ڤاندن
ئه‌ڤرۆ نيوز، فاتما مزوورى:
ل عه‌فرينێ چه‌كدارێن ئۆپۆزسيۆنا سووریێ نوشداره‌كێ كورد و ئەندامێ جڤاتا سڤیل یا عه‌فرينێ د. ئەحمهد سلێمان ره‌ڤاند و به‌ر ب جهه‌كی نه دیار بر.
كوڕێ وی نوشدارى په‌یمان ئەحمهد سلێمان دیاركر كو رۆژا 1ێ خزیرانێ هژماره‌كا چه‌كداران چوونه گوندێ وان “گه‌وركا” یێ سه‌ر ب ده‌ڤه‌را جندرێسێ و بابێ وی ژ ناڤا گوندى بر.
په‌یمان دا زانین ژی، بابێ وی د. ئەحمهد سلێمان و د ده‌ما داویێ دا ببوو ئەندامه‌ك ژ جڤاتا سڤیل یا عىه‌فرينێ، ئەڤه چار چار رۆژه چاره‌نڤیسێ وی نه‌يێ دیارە.
ئه‌ڤ نه جارا ئێكێ يه، گرۆپێن چه‌كدار دكتۆر و كه‌سایه‌تیێن عه‌فرينێ دبه‌ن، رۆژا 29ێ گولانا بۆری چه‌كدارێن “ئه‌حرارا شه‌رقیه” مال و نۆرینگه‌ها د. له‌زگین سالح دزین و تالان كرن و ئەو دكتۆر ژی ره‌ڤاند.
له‌شكرێ توركيا و چه‌كدارێن ئوپۆزسیۆنا سوریێ رۆژا 18ێ ئادارا بوری هه‌رێما عه‌فرينێ داگیر كر و هه‌تا نها ژی ب سه‌دان خۆرت و كه‌سایه‌تیێن عه‌فرينی دگرتينه.