بۆ قوربانیێن دەستێ داعش پەرلەمانێ ئورۆپا رۆژەکا جیھانی دێ دەستنیشان کەت
ئه‌ڤرۆ نيوز:
سەرۆکێ دەزگەھێ ئێزدیان ل ھۆلەندا دیار کر، پێشنیازا دەستنیشانکرنا رۆژا جیھانیا قوربانیێن دەستێن تیرۆرستێن داعش ل پەرلەمانێ ئورۆپا ھاتە وەرگرتن و دبێژیت: پەرلەمانێ ئورۆپا ل سەر ڤێ پیشنیازێ دێ کۆمبوونەکێ ئەنجام دەت.
حەسۆ ھورمێ، سەرۆکێ دەزگەھێ ئێزدیان ل ھۆلەندا ئاشکرا کر، پشتی بزاڤ و لڤینێن بەردەوام پێشنیاز ھاتە کرن رۆژەکا جیھانی بۆ قوربانیێن دەستێن تیرۆرستێن داعش بھێتە دانان و پەرلەمانێ ئورۆپا بۆ وێ چەندێ دێ کۆمبوونەکێ ئەنجام دەت و گۆت: “پەرلەمانێ ئورۆپا ئەڤ پێشنیازە ئیخستیە د ناڤ بەرنامێ خوە دا و ل 4-7-2018 دێ گەنگەشە ل سەر ھێتە کرن، ئەڤە ژی پینگاڤەکا باشە کو سالانە رۆژەک ل ھەموو جیھانێ رۆژا قوربانیێن دەستێن تیرۆرستان بھێتە ساخکرن، داکو ھەموو جیھان بزانیت تیرۆرستان چ تاوانێن ھۆڤانە دژی مرۆڤایەتیێ ئەنجام داینە”.
حەسۆ ھورمی خویا ژی کر، بەری نوکە ژی دەزگەھێ ئێزدیان پێشنیاز کربوو ل نەتەوێن ھەڤگرتی ھێمایێ یان پەیکەرێ رزگاربوویەکا ئێزدی بھێتە دان بۆ وێ چەندێ ھەر کەس و شاندەکێ سەرا نەتەوێن ھەڤگرتی بدەت ببینیت تیرۆرستان چ ب سەرێ ئێزدیان ئینایە ئەو کچ و ژنێن بووینە قوربانی ببنە ھێمایێ ئاشتیێ ل ھەموو جیھانێ.
ھورمی ئەو ژی دیار کر، ھەکە دەلیڤە دروست بیت دێ دەزگەھێ ئێزدیان ل ئورۆپا ژی بەرھەڤی کۆمبوونا پەرلەمانێ ئورۆپا بیت بۆ دانوستاندنێ ل سەر دەستنیشانکرنا رۆژا جیھانیا قوربانیێن دەستێ تیرۆرستان.