خۆله‌كا وه‌رگێرانێ دێ هێته ڤه‌كرن
ئه‌ڤرۆنيوز:
رێڤه‌به‌ريا راگه‌هاندن وچاپ وبه‌لاڤكرنێ ل پارێزگه‌ها دهۆكێ دێ خۆله‌كا وه‌رگێرانێ بۆ وان كه‌سێن حه‌زا وه‌رگێرانه هه‌ى ڤه‌كه‌ت.
بورهان به‌حيا، په‌يڤدارێ رێڤه‌به‌ريا ناڤبرى بۆ ئه‌ڤرۆنيوز گۆت” ئه‌ڤه بۆ جارا دويێ يه رێڤه‌به‌ريا مه خۆلا وه‌رگێرانى ڤه‌دكه‌ت كو ل سالا بۆرى ژى خۆله‌ك هاتبوو ڤه‌كرن بۆ كه‌سێن حه‌ز ل سه‌ر وه‌رگێرانێ هه‌ى”.
بورهانى گۆت ژى” چه‌ند مه‌رجه‌ك بۆ پشكداريێ دخۆلێ دا هاتينه دانان ئه‌وژى كه‌سێ داخوازا پشكداريێ تێدا بكه‌ت حه‌زا وه‌رگێرانێ هه‌بيت وده‌رچوويێ ئاماده‌يى وسه‌رداتر بيت وژبلى زمانێ كوردى زمانه‌كێ دى ژى بزانيت وپێگيريێ ب به‌رنامێ خۆلێ بكه‌ت”.
ل دۆر ده‌م وجهێ خۆلێ ژى گۆت” خۆل دێ ل 12/8/2018 هێته ڤه‌كرن وهه‌تا رۆژا 15/8/2018 به‌رده‌وامبيت وجهێ وێ ژى دێ ل هۆلا نالبه‌ند ل پانۆراما ئازاديێ بيت كو رۆژانه دۆ ده‌مژمێرن ژ5 هه‌تا 7 ئێڤارى”.
ل دووماهيێ گۆت ” هه‌موو پێدڤيێن خۆلێ دێ ژلايێ رێڤه‌به‌ريا مه‌ڤه هێنه دابينكرن وهه‌ر كه‌سێ حه‌زا پشكداريێ هه‌بيت ومه‌رج ل ده‌ف هه‌بن دشێت په‌يوه‌نديێ ب ڤێ هژمارا ته‌له‌فونى بكه‌ت 07504275962″.
