“وەزیرێ خواندنا بلند ژبۆ زانکۆیەکا ئەھلی کولیژەکا زانکۆیا دھۆک دایخستن”
ئەڤرۆ نیوز، سالار دۆسکی:
ب ئیمزا یوسف گوڕان وەزیرێ خواندنا بلند ل حوکمەتا ھەرێما کوردستانێ پشکا پەروەردا ئاینی ل ئێڤاران ل زانکۆیا دھۆک ل دھۆک و ئاکرێ ھاتە دایخستن و پتر ژ 80 قوتابیان ھاتنە دورخستن ژ خواندنێ.
د. رەمزیا حەمزە حەسەن، سەرۆکا پشکا پەروەردا ئاینی ل زانکۆیا دھۆکێ بۆ ئەڤرۆ نیوز گۆت: “ماوێ دو سالانە پشکا پەروەردا ئاینی ئێڤاران ل زانکۆیا دھۆکێ ھاتبوو ڤەکرن، ل دووڤ چەندین مەرجان و ھەر قوتابیەکی بەرامبەر ملیۆنەک و 500 ھزار دیناران دخواند و پێدڤی بوو تێکرایا نمرا ژ 60ێ کێمتر نەبیت، قوتابیێن مە گەھشتبوونە قووناغا دویێ، 31 قوتابی ل دھۆکێ بوون و 50 قوتابی ل ئاکرێ، ب مخابنی ڤە ب بڕیارەکا وەزیرێ خواندنا بلند دەرگەھێ خواندنا ئێڤاران ھاتە داخستن”.
زێدەتر گۆت: “مە چەندین بزاڤ کرن، بەلێ سەر نەگرتن، دەنگۆ ھەیە سالا داھاتی کولیژەکا ئەھلی بۆ ئەڤان قوتابیان ل زانکۆیا جیھان بھێتە ڤەکرن”.
سەرۆکا پشکا پەروەردا ئاینی ئەو ژی گۆت: “ئەڤە ھاتە داخستن ژ بەر ھزرا توندرەویێ و وەزیری راگەھاند بوو نە ژ بەر ڤێ چەندێ یە، بەلێ ب بۆچوونا من ژ بەر پەیوەندی و بەرژەوەندیێن کەسوکی پشکا مە ل ئێڤاران ھاتە داخستن وەک ھاریکاری بۆ کولیژا ئەھلی یا زانکۆیا جیھان کو ل ھەولێرێ ھەیە و سالا بھێت دێ ل دھۆکێ ژی ھەبیت”.
نەڤەشارت ژی کو جھێ زارۆیێن وان ل دھۆکێ بچنە ھەولێرێ ھزرەکا سەلەفی یا توندرەو بینن، ل دھۆکێ ھزرەکا جوان و پاقژ نیشا دابوو و دبوونە خودان باوەرنامە و گەلەک دەرچوویێن شەشێ ھەبوون، ل چو جھان نەدھاتنە وەرگرتن ب رێیا ڤێ پشکێ بەردەوامی دا خواندنا خوە.