كۆمسيۆن دێ كارمه‌ندان دامه‌زرينيت
ئه‌ڤرۆ نيوز:
ب مه‌ره‌ما دابينكرنا كارمه‌ندان بۆ بنگه‌هێن ده‌رخستنا كارتا بايومه‌ترى كۆمسيۆنا بلندا سه‌ربه‌خۆيا هه‌لبژارتنان ل عيراقێ ژڤانێ دامه‌زراندنا كارمه‌ندێن گرێبه‌ست ئاشكه‌را دكه‌ت، جێگرێ سه‌رۆكێ كۆمسيۆنێ ژى رادگه‌هينيت، كارمه‌ندێن نوو دێ هێنه دامه‌زراندن.
رزگار حاجى حه‌مه، جێگرێ سه‌رۆكێ كۆمسيۆنا بلندا سه‌ربه‌خۆيا هه‌لبژارتنا ل عيراقێ راگه‌هاند كو پشتى په‌سه‌ندكرنا بوودجێ عيراقێ، بنگه‌هێن ده‌رخستنا كارتا بايومه‌ترى دێ هێنه ڤه‌كرن و كارمه‌ندێن گرێبه‌ست ژى بۆ بنگه‌هان دێ هێنه دامه‌زراندن، نها ب تنێ كارمه‌ندێن به‌رێ يێن ده‌رخستنا بايۆمه‌ترى بۆ ده‌نگدانێ دێ ده‌ست ب كار بن، به‌لێ پشتى په‌سه‌ندكرنا بوودجا عيراقێ، كارمه‌ندێن نوو ب گرێبه‌ست بۆ بنگه‌هان دێ هێنه دانان.
جێگرێ سه‌رۆكێ كۆمسيۆنا بلندا سه‌ربه‌خۆيا هه‌لبژارتنان ئاشكه‌را كر كو نها ژ سه‌رجه‌مێ 24 مليۆن كه‌سان ب تنێ 11 مليۆن و 800 هزار كه‌سان كارتا بايومه‌ترى يا ده‌نگدانێ ده‌رخستيه، ئه‌ڤه ژى ئه‌وێن ژيێ وان 2001 كو بۆ هه‌لبژارتنێن داهاتى يێن عيراقێ مافێ ده‌نگدانێ دێ هه‌بيت، پێدڤيه كارتا بايومه‌ترى يا ده‌نگدانێ ده‌ربێخن.
رزگار حاجى حه‌مه، ئاماژه ب وێ چه‌ندێ ژى كر كو دڤێت هه‌موو وه‌لاتيێن عيراقێ كارتا بايومه‌ترى يا ده‌نگدانێ هه‌بيت، پرۆسه ژى دێ يا به‌رده‌وام بيت هه‌تا هه‌موو وه‌لاتى وێ كارتێ ده‌ردكه‌ن.
