رۆژا ژ دایكبوونا پێغه‌مبه‌رێ ئیسلامێ ل دهۆكێ دهێته ساخكرن
ئه‌ڤرۆ نیوز، ره‌وان نهێلى
ئه‌ڤرۆ د رێوره‌سمه‌كێ دا ل مزگه‌فتا مه‌زن ل دهۆكێ، رۆژا ژ دایكبوونا پێغه‌مبه‌رێ ئیسلامێ محه‌مه‌د سلاڤێن خودێ ل سه‌ر بن هاته ساخكرن.
د رێوره‌سمى دا مه‌لا ئێحسان رێكانى سه‌رۆكێ سه‌روكێ لقێ دهوك یێ ئێكه‌تیا زانایێن ئاینێ ئیسلامى كوردستان ئه‌ڤ هه‌لكه‌فته ل سه‌رجه‌م گه‌لێ كوردستانێ وعیراقێ پیروزكر و ئاشكراكر بونا پێغه‌مبه‌رى روناهى دا هه‌مى جیهانێ وپه‌یاما دلوڤان وپێكڤه‌ژیان وئاشتیێ په‌یداكر و گۆت: ئه‌و كریارێن داعش نوكه دكه‌ت، ئیسلام یا ژێ دووره.
مه‌لا ئێحسان دیاركر ژبه‌ر وێ یه‌كێ چو رێوره‌سمێن به‌رفره‌ه ل دهۆكێ نه‌هاتنه كرن ژبه‌ر كو دهۆك یێ بوویه باژێرێ شه‌هیدان و هیڤى خواست خودێ ته‌ناهیێ ڤه‌گه‌رینیت بۆ دهۆك و هه‌موو كوردستانێ و تیرورێ ژناڤ ببه‌ت و داعش ب ئێكجارى ژ ناڤ بچیت.
ژ ئالیێ خوه‌ڤه، فه‌رهاد ئه‌ترووشى پارێزگه‌رێ دهۆكێ د په‌یڤه‌كێ دا رۆژا ژ دایكبوونا پێغه‌مبه‌رێ ئیسلامێ ل هه‌موو موسولمانان پیرۆز كر و ئاماژه دا وێ یه‌كێ كو ئه‌ڤا نوكه داعش ب ناڤێ ئیسلامێ دكه‌ت، ئیسلام یا ژێ دووره، ژبه‌ر كو ره‌فتارێن داعش دوورن ژ بنه‌مایێن ئاینێ ئیسلامێ، داعش یێ خه‌لكى سه‌رژێدكه‌ت و كه‌سێن بێ گونه‌ه دكوژیت و زولمێ ل كێم نه‌ته‌وان دكه‌ت، كو ئه‌ڤ چه‌نده ئیسلام یا ژێ دوو بوویه و ئیسلام دینێ ره‌حمێ و دلوڤانیێ یه.
هه‌روه‌سا مه‌لا ئه‌حمه‌د رێكانى، مه‌لایێ مزگه‌فتا جودى د په‌یڤه‌كێ دا ئه‌ڤ بیره‌وه‌ریه ل هه‌موو موسلمانان پیرۆز كر و دیاركر كو ملله‌تێ كورد دێ هه‌ر ل سه‌ر تیرورێ سه‌ركه‌ڤیت.
