گه‌نجه‌ك سه‌را زه‌ڤیه‌كێ هاته كوشتن
ئه‌ڤرۆ نیوز، نه‌وزاد هلۆرى:
ئێڤاره دره‌نگیا ئه‌ڤرۆ ل سه‌ر ئاریشه‌كا كه‌ڤن یا زه‌ڤیان و ته‌رش و كه‌والى، گه‌نجه‌ك ل چیایێ برادوست هاته كوشتن كو خه‌لكێ گوندێ بێلنگرى یا سه‌ر ب ناحیا دیانا بوویه، پۆلیسێن سۆران ژى دیاركر كو فه‌رمانا گرتنێ بۆ بكوژان ده‌رچویه.
كوڤان وه‌لى، وه‌كو ئێك ژ وه‌لاتیان ل قه‌زا سوران بۆ ئه‌ڤرۆ نیوز گۆت: (ئێڤاره دره‌نگیا ئه‌ڤرۆ تیمه‌كا پۆلیسان ل گه‌ل ئه‌مبولانسه‌كێ قه‌ستا چیایێ برادست ل سنوورێ ناحیا دیانا كر، وه‌كو هاتیه زانین كو روودانه‌كا كوشتنێ هه‌یه).
سه‌عدون هاودیانى، ئاخڤتنكه‌رێ پولیسێن سۆران بۆ ئه‌ڤرۆ نیوز گۆت: (ئێڤاره دره‌نگیا ئه‌ڤرۆ پۆلیسێن قه‌زا سۆران هاتنه ئاگه‌هداركرن ل سه‌ر هه‌بوونا روودانه‌كا كوشتنێ ل چیایێ برادوست ل ناحیا دیانا ل سنوورێ قه‌زا سوران، پشتى پۆلیس گه‌هشتینه جهێ روودانێ وه‌سا دیاربوو كو گه‌نجه‌ك بناڤێ (ئه‌نه‌س محه‌مه‌د) ژدایكبویێ سالا 1997 كو خه‌لكێ گوندێ بێلنگرێ یه هاتیه كوشتن).
زێده‌تر گۆت: (ب گۆره‌ى ڤه‌كۆلینێن ده‌ستپێكى وه‌سا دیاربوو كو ئاریشه‌كا كه‌ڤن ل سه‌ر زه‌ڤى و مولك و ته‌رش و كه‌والى د ناڤبه‌را وان دا هه‌بهوویه و ئه‌ڤ گه‌نجه ژبه‌ر هندێ هاتیه كوشتن، ئه‌و كه‌سێن كو ئه‌و گه‌نج كوشتى خه‌لكێ گوندێ خه‌لان یا سنوورێ ناحیا خه‌لیفانن).
ب گوره‌ى ئاخڤتنێن هاودیانى، فه‌رمانا گرتنێ بۆ وان ده‌رچویه و پۆلیس دووڤچوونێن زێده‌تر ل سه‌ر روودانێ دكه‌ن.
