فیستەڤالا گەڕا 25 یا پەیمانگەھا ھونەرێن جوان ل دھۆکێ دەست پێ کر
ئەڤرۆ نيوز:
ل ژێر درووشمێ (ھونەر ھزرێن جودا ھەمبێز دکەت) پەیمانگەھا ھونەرێن جوان ل دھۆکێ فیستەڤالا خوە یا گەرا ٢٥ ێ ب چاڤدێریا (فەرھاد ئەمین ئەترووشی) پارێزگەرێ دھۆکێ، دوھی رۆژا ٢٧ نیسانێ ل ھۆلا کۆنفرانسان ل زانکۆیا دھۆکێ دەستپێکر و دێ بۆ دەمێ دو رۆژێن دی ل پشکێن پەیمانگەھێ یا بەردەوام بیت.
بشار محەمەد تاھر، رێڤەبەرێ پەیمانگەھا ھونەرێن جوان ل دھۆکێ بۆ رۆژناما ئەڤرۆ دیار کر کو ئەڤ سالە ل پشکا مۆزیکێ وان گەلەک گرنگی دایە ئامیرێن کوردی، ھەروەسا ل پشکا شێوەکاری ژی وان بزاڤ کریە گوھۆڕینێن مەزن بکەن کو ل شوونا ھەر پارچەکا کارێ شێوەکاری ل ھۆلەکێ بھێتە نیشادان وان گەلەریەکا مەزن چێکریە و دێ ھەموو کارێن شێوەکاری د وێ گەلەریێ ڤە ھێنە نیشادان و گۆت: “مە چەندین گوھۆڕین د کارێ پەیکەری ژی دا کرینە و پەیکەر مە ژ ماددێ فایبەر کلاسی چێکرینە کو ماددەکێ گەلەک بھێزە و سڤکە و دشیان دایە ئەو پەیکەر ژ جھەکی بۆ جھەکێ دی بھێنە ڤەگوھاستن نەوەکو یێن ژ چیمەنتویێ و گێچێ دھاتنە چێکرن سەنگێ وان گەلەک یێ گران بوو بۆ ڤەگوھاستنێ ژی ب زەحمەت بوون”.
رێڤەبەرێ پەیمانگەھا ھونەرێن جوان ل دھۆکێ ئاماژە ب وێ چەندێ ژی کر کو ئەڤرۆ رۆژا ئێکشەمبی ٢٨/٤/٢٠١٩ێ و ل دەمژمێر ١٠:٠٠ سپێدێ دێ پێشانگەھا پشکا شێوەکاری ل پەیمانگەھێ ھێتە ڤەکرن و گۆت: ”ئەڤ پێشانگەھە ھەتا ئێڤاریا رۆژا ٢٩/٤/٢٠١٩ێ دێ یا بەردەوام بیت، ھەروەسا ھەر ل رۆژا ٢٨/٤/٢٠١٩ێ و ل دەمژمێر ٥:٠٠ ئێڤاری دێ شانۆگەریا پشکا شانۆیێ یا بناڤێ (ھەمی دزیکەر ناھێن بۆ زیانێ) ھێتە نیشادان و ل رۆژا ٢٩/٤/٢٠١٩ێ ئەڤ شانۆگەریە ل ھەمان دەم دێ ھێتە دوبارەکرن.
