ل دۆر بھایێ دەرمانان داخوازەک ژ وەلاتیان دھێتەکرن
ئەڤرۆ نیوز:
ل دۆر بھایێ دەرمانان، وەزارەتا ساخلەمیا حوکمەتا ھەرێما کوردستانێ داخوازێ ژ وەلاتیان دکەت ل ھەر دەرمانخانەکا ھەست ب گرانی و جوداھیا بھایێ دەرمانان بکەن وان ئاگەھدار بکەن و بۆ وێ چەندێ رێ و جھێن پێدڤی بگرنە بەر.
د. خالس قادر، پەیڤدارێ وەزارەتا ساخلەمیا حوکمەتا ھەرێما کوردستانێ دیار کر کو لژنێن دیارکرن و رێکخستنا بھایێ دەرمانان ل دەرمانخانێن ھەرێما کوردستانێ ل سەر کارێ خوە د بەردەوامن و بۆ باسنیۆز گۆت: “ھەتا نوکە ژ سەرجەمێ نێزیکی نەە ھزار جۆرێن دەرمانان ئەو شیاینە بھایێ پێنج ھزار و ٨٠٠ جۆرێن دەرمانان دیار بکەن”.
ناڤھاتی ئاماژە دا وێ چەندێ کو ھەر دەمێ کار ب دووماھی ھات بھا دێ ب دەرمانخانان ھێنەدان و دڤێت ل دەرمانخانێن ھەموو دەڤەرێن ھەرێما کوردستانێ دەرمان ب ئێک بھا ب وەلاتیان بھێنەدان و گۆت: “ھەر دەرمانخانەکا پێگیریێ ب بھایان نەکەت دێ ب توندی ھێنە سزادان”.
پەیڤدارێ وەزارەتا ساخلەمیا حوکمەتا ھەرێما کوردستانێ خویا کر کو پشتی ئەڤ بڕیارە د کەڤیتە د بوارێ بجھئینانێ ژی دا ئەڤ لژنە بەردەوام دێ چاڤدێریا دەرمانخانان کەن ژ بەر ڤێ چەندێ دا خوازێ ژ وەلاتیان دکەن ھەر دەرمانخانەکا بھایەکێ زێدەتر ژ وی بھایێ ھاتیە دەستنیشانکرن ژ وان وەرگریت بلا ئاکەھداریا لژنێن وان بکەن داکو دوڤچوونێ و ڤەکۆلینێ دگەل خودانێ دەرمانخانێ بکەن.
