بۆچى گازا سپى يا پيسه؟
وه‌لاتيێن سنورێ پارێزگه‌ها دهۆكێ گازندا ژ كوالێتيا گازا سپى و په‌نزينێ دكه‌ن و ئه‌ندامه‌كێ په‌رله‌مانێ كوردستانێ ژى راگه‌هاند كو ئه‌و بۆ وى بابه‌تى ل گه‌ل وه‌زاره‌تا سامانێن سرۆشتى ئاخفتينه و سه‌رۆكێ جڤاتا پارێزگه‌هێ ژى دده‌ته زانين ئه‌وان لژنه‌ك بۆ ڤێ مه‌ره‌مێ پێك ئينايه.
به‌یار تاهر دوسكى، ئه‌ندامێ په‌رله‌مانێ كوردستانێ، بۆ ئه‌ڤرۆ نيوز راگه‌هاند كو ئه‌و بۆ ڤێ مه‌ره‌مێ دێ راپۆرته‌كێ پێشكێشی وه‌زاره‌تا سامانێن سروشتی یا حوكمه‌تا هه‌رێما كوردستانێ كه‌ن.
ل دۆر هه‌مان بابه‌ت سه‌رۆكێ جڤاتا پارێزگه‌ها دهۆكێ فه‌هیم عه‌بدولا بۆ ئه‌ڤرۆ نيوز گۆت: “لژنه بۆ چاڤدێریكرنێ هاتیه پێكئینان و نوكه چاڤدێریه‌كا توند ل سه‌ر سۆته‌مه‌نیێ ل پارێزگه‌ها دهۆكێ دهێته كرن”.
زێده‌تر گۆت: “ل جڤاتا پارێزگه‌ها دهۆكێ 14 لژنه هاتینه پێكئینان و نوكه ب رژدی هه‌موو لژنه یێ كاری دكه‌ن بۆ پتر پێش خستن و كێماسیێن كاری ل پارێزگه‌ها دهۆكێ”.
ژ لایه‌كێ دی ڤه به‌رپرسێ پشكا به‌لاڤكرنا كونترۆلا جوری ل رێڤه‌به‌ریا به‌لاڤكرنا سۆته‌مه‌نیێ ل پارێزگه‌ها دهۆكێ سه‌لیم سه‌بری بۆ ئه‌ڤرۆ نيوز گۆت: “سۆته‌مه‌نیا دگه‌هیته پارێزگه‌ها دهۆكێ جوره‌كێ باشه، دبيت تانكه‌ر و تانكێن وه‌لاتيان د پيس بن”.
