کۆمبوونا قونسولێن فەخری یێن وەلاتێن عەرەبی دێ ل ھەولێر ھێتە ئه‌نجامدان
ئەڤرۆ نیوز ، زنار تۆڤی:
وەسا بریارە کۆمبوونا دویێ یا جڤاتا کارگێری یا ئێکەتیا عەرەبی یا کونسولێن فەخری یێن وەلاتێن عەرەبی ل ھەولێرا پایتەختێ ھەرێما کوردستانا عیراقێ ل رێکەفتی (19 تا 2019/7/22)، ب ئامادەبوونا (عەلی باجابر) سەرۆکێ ئێکەتیا عەرەبی یا کونسولێن فەخری، و جێگرێن سەرۆکی و ئەندامێن جڤاتا کارگێری ژ ھەر ئێک ژ وەلاتێن (عیراق، مەغرب، سعودیە، مسر، سودان، موریتانیا، لبنان، سوریا) بھێتە بەستن.
د . ئەحمەد جەلال کونسۆلێ فەخری یێ وەلاتێ سریلانکا بۆ ئەڤرۆ نیوز گۆت: ئەو وەکو رێکخەر و کونسولێ فەخری یێ وەلاتێ سریلانکا ل ھەولێرێ و جێگرێ سەرۆکێ ئێکەتیا عەرەبی یا کونسولێن فەخری، دێ رابیت ب پێشوازیا کونسولێن فەخری یێن وەلاتێن پشکدار و رێکخستنا رێورەسمێن ڤێ کومبوونێ دێ ل ھوتێلا ھەولێر یا نیڤدەولەتی ھێنە ئەنجامدان، ھەروەسا ھژمارەکا تەوەر و بابەتێن جودا جودا یێن گرێدایی کونسولێن فەخری یێن وەلاتێن عەرەبی دێ ھێنە گەنگەشەکرن، ل گەل سەرەدانا ھژمارەکا کەسایەتی و سیاسەتمەدار و کاربەدەستێن حکومی و سیاسی و ئابووری و پسپور د وارێن جۆدا دا و دیسا ئەو دێ سەرەدانا ھژمارەکا جھێن گەشت و گوزاری ل ھەرێما کوردستانێ کەن.
ناڤھاتی ئەو ژی گۆت: ئەنجامداندانا ڤان جورە کومبوونان دەستەکەفتەکێ مەزنە بۆ ئەندامێن پشکداربووی ژ وەلاتێن جودا، ب مەرەما لێک گوھارتن و مفا وەرگرتن ژ شیان و ھزرو بیرێن ھەڤدو د وراێن جودا یێن ژیانێ دا، و بھێزکرنا رولێ کونسولێن فەخری و گرنگی دا ب پێگەھێ وان یێ دبلوماسی، بۆ زانین ھژمارا کونسولێن فەخری یێن ل وەلاتێن عەرەبی دگەھیتە 705 کونسولا ھاتینە دابەشکرن لسەر 20 وەلاتان پێک دھێن ژ کەسایەتیێن ئابووری، بازرگانی، سیاسی، و کومەلایەتی، ژ بۆ موکومکرن و بھێزکرنا پەیوەندیان دناڤبەرا وەلاتێن پشکدار د ئێکەتیێ دا و گەھشتن ب لێک تێگەھشتن و کارکرن ژ بۆ ئارمانجێن ھەڤپشک یێن وارێن جودا یێن ژیانێ.