رێیا بەردەڕەش بۆ ناحیا رۆڤیا دێ ھێتە چێکرن
بەرەدەڕەش، ڕەزوان ڕۆژبەیانی:
بەرپرسێ راگەھاندنا قایمقامیا قەزا بەردەڕەش ڕاگەھاند، حەفتیا بھێت کار ل سەر پرۆژێ تمامکرنا رێیا بەردەڕەش بۆ ناحیا رۆڤیا دێ ھێتەکرن.
بۆتان بۆتانی، بەرپرسێ ڕاگەھاندنا قایمقامیا قەزا بەردەڕەش بۆ ئەڤرۆ نیوز خویا کر، رێیێن سنوورێ قەزا بەردەڕەش گەلەک تێکچووینە و پێدڤی ب نووژەنکرن و چێکرنێ نە و گۆت: “حەفتیا بھێت کار ل سەر پرۆژێ تمامکرنا رێیا قەزا بەردەڕەش بۆ ناحیا رۆڤیا دێ ھێتە کرن کو رێیەکا ستراتیژیە و گرنگە بۆ دەڤەرێ”.
گۆتژی: “ئەڤ پرۆژە ژ بەر قەیرانا دارایی و شەڕێ داعشێ ماوێ چەند سالن بوو کار ل سەر ھاتبوو راوەستاندن، بەلێ ب ئانەھیا خودێ حەفتیا بھێت کار ل سەر دێ ھێتە کرن بۆ ماوێ دو ھەیڤان دێ ھێتە تمامکرن و ھێتەڤەکرن”.
بۆتان بۆتانی ئاشکرا ژی کر، درێژاھیا رێیا کو دھێتە چێکرن ١٣کیلۆمەترن و ٣٤ ملیار دینار ژ لایێ حوکمەتا ھەرێمێ ڤە بۆ ھاتینە مەزاختن، بەلێ ل دەمێن بۆری ٧٥% کار ل سەر ھاتیە کرن و دێ ل دو ھیڤێن بھێت ئەوا مای ژی ھێتە تمامکرن.
