عادل عه‌بدولمه‌هدى دێ ده‌ست ژ كار كێشیت؟
ئه‌ڤرۆ نیوز:
ل ڤێ دووماهیێ ده‌نگوباسێن نیه‌تا عادل عه‌بدولمه‌هدى سه‌رۆك وه‌زیرێن عیراقێ بۆ ده‌ست ژ كار كێشانێ ژ پۆستێ خوه د ناڤ ناڤه‌ندێن سیاسى ل عیراقێ زێده بوویه، هه‌ر چه‌نده نڤیسینگه‌ها عه‌بدولمه‌هدى به‌لاڤكریه كو ناڤبرى هه‌تاكو هزر ژى د ده‌ست ژكاركێشانێ دا نه‌كریه و ئه‌ڤ بابه‌ته بۆ په‌رله‌مانێ عیراقێ دزڤریت.
كه‌سایه‌تیه‌كێ ئه‌كادیمى یێ عیراقى بۆ ئه‌ڤرۆ نیوز دیاركر” نه‌كو ئه‌ڤرۆ، به‌لكو هه‌ر ژ ده‌ستپێكا پێكئینانا حوكمه‌تا عیراقى یا نوو كو تێدا بۆ ئێكه‌مین جار پشتى سالا 2003 سه‌رۆك وه‌زیران ژ ده‌رڤه‌یێ مه‌زنترین لیستا په‌رله‌مانى دهێته دیاركرن، بژاره‌یا ده‌ست ژ كاركێشانێ یا ل ده‌ف عادل عه‌بدولمه‌هدى هه‌ى، ژ به‌ركو ئه‌و ب خوه به‌ربژاره‌كێ ته‌وافوقى بوو یێ هه‌ردو لیستێن سائیرون و فه‌تح كو وان هه‌ردو لیستا ب خوه چه‌ندین ناكۆكى یێن هه‌ین”.
ل دووڤ هنده‌ك شرۆڤه‌كارێن سیاسى، عادل عه‌بدولمه‌هدى پشتى پۆستێ سه‌رۆكاتیا وه‌زیران وه‌رگرتى، شیا نێزیكبوونه‌كێ ل گه‌ل كوردان بكه‌ت و چه‌ندین شاندێن كوردستانى سه‌ره‌دانا به‌غا كرن و به‌رۆڤاژى چه‌ندین شاندێن حوكمه‌تا عیراقى سه‌ره‌دانا هه‌رێمێ كرن و پشتى كابینا نوو یا حوكمه‌تا هه‌رێمێ هاتیه پێكئینان چه‌ندین نامێن ئه‌رێنى ژ لایێ حوكمه‌تا نوو یا هه‌رێمێ ڤه بۆ به‌غدا هاتنه هنارتن ب تایبه‌تى ل دۆرحه‌زا حوكمه‌تا هه رێمێ بۆ چاره‌سه‌ركرنا كێشێن هه‌لاویستى ل گه‌ل به‌غدا.
نێزیكبوون و لێكتێگه‌هشتنا هه‌رێمێ و به‌غدا پتر سه‌قامگیرى د عیراقێ دا په‌یداكر، به‌لێ ل دووڤ هنده‌ك چاڤدێران ئه‌ركه‌كێ ب زه‌حمه‌ت ل به‌رامبه‌ر عادل عه‌بدولمه‌هدى یه بۆ ئینانا حه‌شدا شه‌عبى ( ب تایبه‌تى هنده‌ك میلیشیاتێن وێ حه‌شدێ) بۆ دبن ركێڤا له‌شكرێ عیراقێ دا، ب تایبه‌تى پشتى حه‌شدا شه‌عبى پێكئینانا هێزا ئه‌سمانى یا تایبه‌ت ب حه‌شدێ ڤه راگه‌هاندى كو ئێكسه‌ر پشتى وێ چه‌ندێ موقته‌دا سه‌درپه‌یامه‌ك به‌لاڤكرى و تێدا به‌حسێ ( دووماهیا حوكمه‌تێ) كرى ودیاركرى كو حوكمه‌تا عیراقێ یا به‌ر ب دووماهیێ ڤه دچیت و ژ ده‌وله‌تا قانوونێ به‌ر ده‌وله‌تا ئاژاوه‌گیریێ دچیت و هه‌كه حوكمه‌ت پێرابوونان وه‌رنه‌گریت، ئه‌ز دێ دووركرنا خوه ژى راگه‌هینم.
ژ لایه‌كێ دى ڤه، محه‌مه‌د رزا سه‌رۆكێ لژنا ئاسایشێ و به‌رگریێ ل په‌رله‌مانێ عیراقێ ژ لیستا (سائیرون) ب سه‌رۆكاتیا موقته‌دا سه‌در داخواز ژ عادل عه‌بدولمه‌هدى كر وه‌كو فه‌رماندێ گشتیێ هێزێن چه‌كدار ل عیراقێ سه‌روه‌ریا وه‌لاتى و ده‌زگه‌هێ له‌شكرى ل عیراقێ بپارێزیت و راگه‌هاند” ئه‌م دبینین كو نیه‌ته‌ك یا هه‌ى یان ژى ب دروستى حه‌شدا شه‌عبى نڤیساره‌ك ل دۆر پێكئینانا هێزه‌كا ئه‌سمانى یا ده‌ركرى و ئه‌م ل لژنا ئاسایشێ و به‌رگریێ داخوازێ ژ فه‌رماندێ گشتیێ یێ هێزێن چه‌كدار دكه‌ین په‌یكه‌رێ ده‌زگه‌هێن له‌شكرى و ئه‌منى یێن عیراقى بپارێزیت و هه‌كه حه‌شدێ ئه‌و بریار بجهئینا دێ ده‌زگه‌هێن له‌شكرى و ئه‌منى ل عیراقێ لاواز بن و ئه‌و چه‌نده مه‌ترسیه‌كا مه‌زنه”.
بورهان مه‌عموورى، ئه‌ندامێ په‌رله‌مانی عیراقێ ژ لیستا (سائیرون) ره‌تكر كو ب رێیا وێ ناما خوه، موقته‌دا سه‌در پشتا خوه دابیته حوكمه‌تا نوكه یا عیراقێ و گۆت” ناما سه‌درى یا رۆهن بوو كو نه پشت ل حوكمه‌تێ یه یان بزاڤا ڤه‌كێشانا باوه‌ریێ یه ژێ، به‌لكو بزاڤه‌كه د به‌رژه‌وه‌ندیا حوكمه‌ا عیراقێ دا و موقته‌دا سه‌در دخوازیت حوكمه‌تێ هێز د پێرابوونان دا هه‌بیت بۆ پاراستنا وه‌لاتى و سه‌روه‌ریا ده‌وله‌تێ و ده‌زگه‌هێن وێ.
مه‌عموورى دیاركر” پێدڤیه ل سه‌ر سه‌رۆك وه‌زیرێن عیراقێ هه‌موو بریارێن چاره‌نڤیسساز بكه‌ته د ده‌ستێ خوه دا و رێ نه‌ده‌ت بریارێن تاكلایه‌نه بهێنه دان”.
به‌لێ د هه‌مان ده‌م دا ره‌خنه ل حوكمه‌تا عه‌بدولمه‌هدى گرتن و گۆت” ده‌مێ ده‌نگدان ل سه‌ر حوكمه‌تێ و برۆگرامێ وێ هاتیه كرن كو حوكمه‌ته‌كا خزموتگوزاریان بیت، به‌لێ هه‌تا نوكه ئه‌و چه‌نده نه‌كریه كو وه‌لاتیێ عیراقى رازى بكه‌ت، به‌لكو گه‌له‌ك شكه‌ستن د بجهئینانا به‌رنامێ خوه دا یێن ئیناین.
گۆت ژى” ل ده‌ستپێكا وه‌رزێ قانوون دانانێ یێ بهێت دێ سه‌رۆك وه‌زیران و هنده‌ك وه‌زیرێن وى هێنه مێهڤانكرن ل په‌رله‌مانى تاكو بۆمه راستیا هاتیه بجهئینان د به‌رنامێ حوكمه‌تێ دا” لێ دیاركر ژى” ئه‌وا موقته‌دا سه‌در گۆتى هه‌تاكو د هوشداریا خوه دا بۆ حوكمه‌تێ ئانكو پشته‌ڤانى بوو بۆ سه‌رۆك وه‌زیران ژبه‌ركو سه‌درى حوكمه‌ته‌كا ب هێز دڤێت”.