هه‌ر باشیه‌كا دكه‌م بو من ب خرابی دزڤریت
ئه‌ڤرۆ نيوز:
كچه‌كا 26 سالی دلێ خوه بو ئه‌ڤرو ڤه‌دكه‌ت و دبێژیت: من زانكو ب دووماهی ئینایه، ئاستێ من یێ ره‌وشه‌نبیری یێ باشه و من گه‌له‌ك په‌رتوك خواندینه و زانیاریێن باش هه‌نه و من گه‌له‌ك باوه‌ری بخوه هه‌یه، من خوه كریه شیره‌تكارا جڤاكی، دناڤ خێزانا خوه و مرۆڤ و كه‌س و كار و هه‌ڤالێن خوه و ئه‌ز هاریكاریا وان دكه‌م، ده‌مێ خه‌له‌تیه‌كێ ژ ئێكی دبینم ئه‌ز دبێژمێ ئه‌ڤه خه‌له‌تیه و ئاموژگاریا لێ دكه‌م، به‌لێ ئاریشا من ئه‌وه ئه‌ز هاریكاریا كێ بكه‌م بو من ب خرابی دزڤریت، ئه‌ز ژی نه‌شێم چاڤێن خوه بگرم، وژدانا من قه‌بیل ناكه‌ت ئێك خه‌له‌تیه‌كێ بكه‌ت یان ل سه‌ر رێیه‌كا خه‌له‌ت بیت ئه‌ز نه‌بێژمێ، ژبه‌ركو ئه‌ز نه‌شێمه خوه و ئه‌ز حه‌ز دكه‌م هاریكاریا وان بكه‌م و ئاموژگاریا لێ بكه‌م، به‌رده‌وام ئه‌ز تشتێ باش ژی بو دبێژم به‌س هه‌موو بو من ب خرابی دزڤریتن، ئه‌ڤجا ب دیتنا هه‌وه ئه‌ز چ بكه‌م چاره‌سه‌ری چیه ؟
كچا هێژا:
هه‌رچه‌نده كاره‌كێ جوانه تو دكه‌ی، به‌س جڤاك ب گشتی هوسایه، چه‌ند تو تشتێ باش بو خه‌لكی بێژی خوه ماندی بكه‌ی گوهێ خوه نا ده‌نه ته و ئاموژگاریێن ته، حه‌تا هه‌كه نامه و ئاموژگاریێن ته بو وان د باش ژی بن ئه‌و گوهداریا ته ناكه‌ن، هه‌كه گوهداریا ته بكه‌ن ژی وی تشتی ناكه‌ن ئه‌وێ تو دبێژیێ.
ژبه‌رهندێ ماده‌م ته زانیاری هه‌نه تو دشێی بو خوه لاپه‌ره‌كێ جڤاكی دناڤ سوشیال میدیایێ دا دروست كه‌ی، مه‌رج نینه بناڤێ ته بیت، تو دشێی ب ناڤه‌كێ جڤاكی بدانی و ڤان سه‌ربور و زانیاری و تشتێ خوه یێ جوان هه‌موویان د وێره دا به‌لاڤ كه‌ی، دێ گه‌له‌ك كه‌س بو خوه مفای ژێ بینن، هه‌ر كه‌سێ لدووڤ باشیێ و ئاموژگاریا بگه‌ریت، حه‌تمه‌ن دێ لته ژی گه‌ریت و داخوازا هاریكاریێ ژ ته كه‌ت.
به‌س هه‌كه نها تو خوه بكه‌یه شیره‌تكارا جڤاكی دناڤ خێزانێ و هه‌ڤالا و سه‌رگێژیێ بو خوه چێكه‌ی و لدووڤ ڤان كه‌سا بكه‌یه غار و بێژیێ وه‌نه‌كه و ئه‌ڤه خه‌له‌ته، بڤی ره‌نگی كه‌س گوهداریا ته ناكه‌ت، چونكی تو نه ڤه‌كوله‌را جڤاكی و تو چ تشتا وان نینی و ته شوله‌پێ نینه، ئه‌ڤجا سه‌رێ خوه ب ڤان تشتاڤه نه ئێشینه.
به‌لێ هه‌كه كه‌سه‌كێ پرسیاره‌ك ژ ته كر ب راستگویی به‌رسڤا وان بده و هه‌ر كه‌سه‌كێ پێدڤی ب هاریكاریا ته بۆ، ب وژانه‌كا ساخ هاریكاریا وان بكه و رێیێن باش نیشا بده، به‌لێ هه‌كه كه‌سه‌كێ پرسیار ژ ته نه‌كر و داخوازا هاریكاریێ ژ ته نه‌كر لدووڤ نه‌چه و خوه ماندی نه‌كه.
به‌رسڤدان: ده‌روونناس ئاواز
گۆشا دلێ خۆ ڤه ل سه‌ر فه‌يسبۆكى