زانكۆیا دهۆك كەرەستەك ب ناڤێ (VTM) بۆ تاقیكرنا ڤایرۆسێ كۆرۆنا یێ بەرهەم ئینا
ئەڤرۆ نیوز:
كۆلیژا دەرمانسازی ل زانكۆیا دهۆك شیایە ئەو شلەمەنیا ڤایرۆسێ كۆرۆنا پێ ڤەدگوهێزنە تاقیگەها ((Viral-Transport-Medium بەرهەم بینیت، ب سەرپەرشتیا سەرۆكێ زانكۆیا دهۆك پ. د. موسلح دهۆكی و ل سەر داخوازیا رێڤەبەرێ گشتی یێ ساخلەمیا پارێزگەها دهۆكێ د. نزار عسمەتی ئەڤ كارە هاتیە ئەنجامدان.
راگرێ كۆلیژا دەرمانسازی ل زانكۆیا دهۆك د. موئەیەد ئاغالی میرزا دیار كر: كو ئەڤ بەرهەمئینانە ب هەڤكاری ل گەل تاقیگەها دهۆك یا ناڤەندی و كۆمپانیا نیوساندرد یا كۆنترۆلا جۆری بوویە، كو د. جاسم محەمەد عەبدو پرۆفیسۆرێ هاریكار ل كۆلیژا دەرمانسازی ب هەڤکاری ل گەل چەند بسپۆرەکا ل زانکۆیێ و تاقیگەها دهۆك یا ناڤەندی رابووینە ب بەرهەڤ كرن و بەرهەمئینانا ڤی كەرەستەی و لدووڤ سالوخەتێن جیهانی.
هەتا نوكە 500 یەکە ژێ هاتینە بەرهەمئینان و كار یێ بەردەوامە لدووڤ داخواز و پێدڤیا رێڤەبەریا پاراستنا ساخلەمیا دهۆك كو رۆژانە ژ 100 هەتا 200 یەکا د شیاندایە بهێنە بەرهەمئینان، داكو ساخلەمیا دهۆك بشێت بەردەوام سەمپلا ژ كەسێن گۆمان لێكری ب توشبوونا ڤایرۆسێ كۆرۆنا وەگریت بۆ پشكنینێ.
بەرهەمئینانا ڤێ شلەمەنیێ د دەمەكی دایە كو نوكە ساخلەمیێ پتر ژ هەر دەمەكی پێدڤی یا پێ هەی نەمازە ئینان و پەیداكرنا وی ل بازارێن ناڤخۆیی ئەستەمە و هاوردە گكرنا وێ ژی ژ دەرڤە ژ بەر ڤی كاودانی یا ب زەحمەتە، لەوما ئەڤ دەستپێشخەریە ژ لایێ زانكۆیا دهۆك ڤە هاتیە كرن كو ئێكە ژ دەستكەفتێن دی یێن زانستی ئەوێن زانكۆیا دهۆك پێشكێشی جڤاكی ب گشتی دكەت.
هەروەسا پشکدارێن چێکرنا ڤێ شلەمەنیێ ئەڤەنە:
جاسم محەمەد عەبدو پرۆفیسۆرێ هاریکار ل کۆلیژا دەرمانسازی و راوێژکارێ زانستی ل کۆمپانیا نیوستاندرد.
د. رەوەند عەبدولخالق سەبری ل لابورا ناڤاندیا دهۆك.
د، سەعدوللا فەریق سالح ل لابورا ناڤاندیا دهۆك
مامۆستا غەزوان ئەحمەد محەمەد رەئوف هاریکارێ راگرێ کۆلیژا دەرمانسازی.