په‌رله‌مانتارێن پارتى بزاڤێ دكه‌ن شایسته‌یێن قه‌زا شێخان ژ حكومه‌تا به‌غدا بزڤرینن
ئەڤرۆ نیوز، بارزان مزوورى:
ئه‌ڤرۆ رێكکه‌فتى 17/8/2020 شانده‌كێ په‌رله‌مانتارێن به‌غدا سه‌ر ب لیستا پارتى دیموكراتى كوردستان سه‌ره‌دانا” سه‌ردار یەحیا عەبدولعەزیز قایمقامێ قه‌زا شێخان کرن و ل گەل وی كومبوونه‌ك هاتە ئه‌نجام دان ژ بۆ ئه‌نجامدانا رێكکه‌فتنه‌كێ بۆ ده‌ستڤه‌ئینانا شایسته‌یێن قه‌زا شێخان ژ حكومه‌تا به‌غدا.
د.فارس بریفكانى په‌رله‌مانتار ل په‌رله‌مانێ عێراقێ بۆ رۆژناما ئه‌ڤرۆ دیار كر سه‌ره‌دانا شاندێ په‌رله‌مانتارێن عێراقێ یێن سه‌ر ب لیستا پارتى دیموكراتى كوردستان بۆ شێخان دگه‌ل قایمقامێ قه‌زا شێخان كومبوین ل دور رێكه‌فتنه‌كا نوى كا هاتن و چوونا ئیدارا قه‌زا شێخان یا به‌رده‌وام بیت دگه‌ل ئیدارا پارێزگه‌ها مووسل و حكومه‌تا به‌غدا كو به‌رده‌وام سه‌ره‌دانا وان بكه‌ن بۆ ده‌ستڤه ئینانا شایسته‌یێن خوە یێن قه‌زا شێخان ژ وانا دابینكرنا پرۆژێن خزمه‌تگوزارى وه‌كو ئاڤ و كاره‌با و وه‌رزش و لاوان و ته‌ندروستى و چه‌ندین پرۆژێن دى یێن جودا، ژ به‌ر كو وه‌سا دیاره ئه‌ڤ ده‌ڤه‌ره پێدڤى ب هاریكاریێن ئابوورى یه ل ئیدارا مووسل.
ناڤهاتى خویاكر د ڤێ كومبوونێ دا پلانه‌ك و نه‌خشه رێیه‌كا باش هاتە دارێژتن دگه‌ل حكومه‌تا به‌غدا دێ ل دووڤ وێ پلانێ چین بۆ ده‌ستڤه‌ئینانا شایسته‌یێن قه‌زا شێخان هەکە مه سه‌ركه‌فتن ئینا ل دووڤ وێ پلان و رێكکه‌فتنا هاتیه كرن دێ گوهورینه‌كا مه‌زن كه‌فتیه ده‌ڤه‌رێ ژ بۆ ئه‌نجام دانا پرۆژێن خزمه‌تگوزارى ل سه‌ر ئاستێن ده‌ڤه‌رێن دى ئه‌م وه‌ك په‌رله‌مانتارێن لیستا پارتى دێ به‌رده‌وام بین ل سه‌ر ده‌ستڤه‌ئینانا وان شایسته‌یا.
ناڤهاتى گۆت: (دگه‌ل پارێزگارێ دهوك یێ نوو ژى رێكکه‌فتینه كو ب هاریكاریا وى پرۆژێن مه‌زن گه‌هینه ده‌ڤه‌رێن مادێ 140 ئه‌وێن ل بن ده‌ستهه‌لاتا هێزێن پێشمه‌رگه‌ى كو هه‌ر بودجه‌یه‌كا بۆ مووسل بهێتە دابینكرن به‌شه‌ك ژ وێ بودجێ بۆ ده‌ڤه‌رێن مادێ 140 بیت) .
