كه‌لها ئالۆكا ژكوژیه‌كێ دى
ئیسماعیل تاهر
ڤى جهى گرنگى و گرانیا خوه د مێژوویا باژێڕى مه‌دا هه‌یه و بیرا مه ل خۆراگریا ژماره‌كا بژاره‌یا خانمێن ده‌ڤه‌را مه دئینیت، ئه‌ڤ هه‌ڕفته بوویه به‌لگه‌یه‌كێ زیندى ل سه‌ر راددێ مه‌زنێ وێ سته‌ما ملله‌تێ مه د مێژوویا خوه یا سه‌رده‌م دا تووشبویێ و تۆماره‌كا دى یا پڕ شانازى بۆ مه ل پاش خوه هێلا، ژ ڤى ئاراسته‌یى زیندیكرنا وێ كه‌لهێ و ئه‌و روودانێن جه‌رگبڕێن لێ په‌یدابووین جهه‌كێ تایبه‌ت هه‌یه و هه‌ر ژبه‌ر هندێ ئه‌ڤ به‌رهه‌مێ بژاره جهێ ده‌ستخۆشى و رێزگرتنێ یه، هۆسا جوان و رێوكوپێك و دیكۆمێنتكرى و ئه‌كادیمى ب ژماره و لیسته و به‌لگه و وێنه د پرتووكه‌كێ دا جهه‌كێ گرنگ و ب سه‌نگ د پرتووكخانا كوردی دا گرتى.
دكتۆرێ پێشمه‌رگه حه‌سه‌ن عه‌سكه‌رى گه‌له‌ك كاریێ كرى، لێگه‌ڕیان و ل دویڤچوون و ڤه‌كۆلینا كرى، یێ ماندیبوویى هه‌تا ئه‌ڤ شاكاره به‌رهه‌مێ جوانێ هۆسا لێكدایى و رێكوپێك خڕڤه‌كرى و ب شێوازه‌كێ ئاست بلندێ ئه‌كادیمى دارشتى ب ره‌نگه‌كى پرتووكخانا كوردى شانایێ پێبكه‌ت و پشكه‌كا گرنگا مێژوویا سیاسى یا ده‌ڤه‌رێ زیندیكه‌ت و ڤێ قووناغێ ژ وندابوون و مرنێ بپارێزیت و ب ده‌هان به‌لگه و وێنه و ناڤان پێشچاڤى وه‌رگرى و پویته‌كاران بكه‌ت و ل بیرا مه بینیت كا ڤى باژێڕى و ڤێ ده‌ڤه‌رێ و ڤى خه‌لكێ خۆڕاگر چه‌ند سته‌م و زۆردارى و سه‌ختى دیتیه.
ژبلى دروستكرنا لیسته وێنه و ناڤێن زیندانیان و دانه‌نیاسین و دیاركرنا سیڤیێن وان بیره‌وه‌ریێن ژماره‌كا مه‌زنا وان ژى تۆماركرینه و ئه‌ڤه بخوه ئه‌ركه‌كێ مه‌زنه، هنده‌ك ژ وان د ژیانێ دا ماینه و هنده‌كان باركریه ژیانا نه‌مریێ، له‌و له‌ش، گیان دچنه گۆڕى و رویبروى دیدارا خودایێ مه‌زن و دلۆڤانیا وى دبن، لێ گۆتن و بۆچوون و بیرهاتنێن وان ب ڤى ڕه‌نگى زیندى دمینن و هۆسا ئه‌رشیفێ ملله‌تان دمینیت و دبیته به‌لگه ل سه‌ر قووناغێن ژیانێ و دبنه په‌ند و سه‌ربۆڕ بۆ ده‌ستێن داهاتى، بیره‌وه‌ریان وه‌ك توخمه‌كێ به‌رزێ نڤیسنێ چێژ و گرانیه‌گا تایبه‌ت هه‌یه د مێژوویا مرۆڤایه‌یێ دا و كۆژیه‌كێ گرنگێ تۆمارا دیرۆكێ ژێ دهێته دروستكرن، ئه‌و كه‌سێن د ڤى كه‌لهێ ڤه ساڵ بۆراندین، ژیانا زڤر و سه‌خت و دژوار دیتى، ره‌فتارێن ره‌شه‌كێن رژێمێ دیتین، ب خوه ژكویراتیا دلى ڤه‌دگێڕن و دبنه دیده‌ڤان ل سه‌ر وى تشتێ هاتیه روودان، جوانتر و رۆهنتر ژ رۆمانڤیسان و چیرۆكبێژان ڤه‌دگێڕن و سه‌رهاتیا رۆژێن گران دكه‌نه به‌رپه‌ڕێن گه‌شێن مێژوویێ.
هه‌لوێستێن وان، خۆڕاگریا وان هۆكاره‌كێ سه‌ره‌كى بوویه به‌رده‌وامى ب ئه‌ركێ پێشمه‌رگاتیا كۆڕ و هه‌ڤژین و بابێن وان بهێته‌دان، وان ب نامه‌یێن نڤیسى و زاره‌كى كه‌سوكارێن خوه یێن پێشمه‌رگه ئاگه‌هداردكرن بلا ئه‌م د ڤێ كه‌لها ئاسێ و تاریڤه بین، ئازاران بكێشین، بلا ئه‌م بسۆژین دا شه‌مالكا به‌رخودانێ كز نه‌بیت، نه‌ڤه‌مریت، ئه‌م دێ به‌رخودانێ كه‌ین و خوه راگرین لێ هوین چه‌په‌ران به‌رنه‌ده‌ن، یا ئه‌م دكه‌ین پشكه‌كا وێ كوردینیێ یه یا هه‌وه ژیانا خوه بۆ ته‌رخانكرى، ئه‌ڤه گرنگترین نامه بوو ژ وێ كه‌لها ئاسێ گه‌هشتیه ره‌شه‌كێن رژێمێ به‌رى بگه‌هیته پێشمه‌رگه‌یى و ئه‌ڤ هه‌لویسته بوون ل دووماهیێ بووینه هێڤێنێ سه‌ركه‌فتن و سه‌رفه‌رازیێ.
كته‌كا خانمێن زیندانكرى زارۆیێن وان ل گه‌ل بوون و كته‌ك ژى د دوگیان بوون ده‌مێ به‌رێ وان دایه زیندانا هۆڤ و تارى، هنده‌ك زارۆ یێن ل وێرێ مه‌زن بووین و هنده‌ك ژى یێ ل وى جهى ژدایكبووین، نڤیسه‌ر ب خوه ژى ئێك ژ وان بوو یێن چه‌ند ساڵێن ژیێ خوه لێ ده‌ربازكرین، ئه‌ڤ به‌رهه‌مێ جوان و هێژا هاندانا وان ساڵان بوویه و كارلێكریه دلده‌ڕیژ بكه‌ت، بیت ئه‌ڤ هزره ب ساڵان د مێشكێ وی دا گه‌ڕیایه هه‌تا ئه‌و خه‌ون كریه دۆرهێل و د ئه‌نجام دا ئه‌ڤ به‌رهه‌مێ ب هێز پێشكێشى گه‌ل و وه‌لاتێ خوه و مێژوویێ كرى، خۆزى ئه‌ڤ شاكاره بۆ هنده‌ك زمانێن دیتر ژى هاتبا وه‌رگێڕان، ل به‌راهیا وان ژى عه‌ره‌بى، زمانێ داگیركه‌رێن كوردستانێ.
