چالاکڤانێن رۆژھەلاتێ کوردستانێ دەست ب کەمپینەکا مەزن کرینە
ئەڤرۆ، ھۆشەنگ تاجر:
ب ھزاران چالاکڤانێن رۆژھەلاتێ کوردستانێ ب رێیا تۆرێن جڤاکی دەست ب کەمپینەکێ بۆ ئازادکرنا گرتیێن کورد ل رۆژھەلاتێ کوردستانێ کرینە و چالاکڤانەک ژی دیار دکەت کو د ماوەیێ بیست رۆژێن بۆری دا سەد چالاکڤانێن کورد ل رۆژھەلاتێ کوردستانێ ھاتینە گرتن و دڤێت دەولەتا ئیرانێ وان کەسان ئازاد بکەت.
رزا کەعبی سیاسەتمەدارێ رۆژھەلاتێ کوردستانێ بۆ ئەڤرۆ دیار کر کو دەستھەلاتا ئیرانێ دەست ب ھەوەکا نوو یا دەستەسەرکرنا و ژناڤبرنا کوردان کریە و د ماوەیێ بیست رۆژێن بۆری دا پتر ژ سەد چالاکڤانێن کورد ل رۆژھەلاتێ کوردستانێ و ئیرانێ ھاتینە دەستەسەرکرن و ھەوا دەستەسەرکرنا کوردان ب دژواری بەردەوام دکەت و گۆت: (دەستھەلاتا ئیرانێ دڤێت کوردان بێ ئیرادە بکەت و چالاکڤانێن کورد بکەتە زیندانێ دا کورد ل ئیرانێ بێدەنگ بن و داخوازا مافێن خوە نەکەن، بێگومان یا نھا ل دژی کوردان ل ئیرانێ دھێتە کرن تشتەکێ نوو نینە، ب سالانە رژێما ئیرانێ کوردان دەستەسەر دکەت و ل سێدارە ددەت).
ناڤھاتی ئەو یەک ژی دیار کر کو ل گۆر راپۆرتێن رێکخراوێن مافێن مرۆڤی رێژا ھەری زێدە یا کەسێن کو ئیران ل سێدارە ددەت کوردن و ئەو یەک ژی نیشا ددەت کو دوژمناتیا رژێما ئیرانێ ل ھەمبەر گەلێ کورد ب دژواری بەردەوام دکەت و نھا ژی دەستھەلاتا ئیرانێ ل سەر چەندین پیلانێن جودا جودا ل دژی گەلێ کورد کار دکەت و گۆت: (ئیران ھەرێما کوردستانێ ژی وەکو مەترسیەکا گەلەک مەزن بۆ خوە دبینیت، چونکو ھەبوونا ھەرێما کوردستانێ وەسا کریە کو د ئاستێ نێڤدەولەتی دا کورد و پرسا کوردی ببیتە خالەکا گرنگ و نھا کورد پتر ژ ھەر دەمەکێ د رۆژەڤێ دانە، ھەرێما کوردستانێ پێگەھەکێ خوە یێ سیاسی یێ ب ھێز ھەیە و ب سالانە ئیران و دەولەتێن دی یێن داگیرکەر کار بۆ ژناڤچوونا قەوارێ ھەرێما کوردستانێ دکەن).
ئازاد کوردی چالاکڤانێ کوردێ رۆژھەلاتێ کوردستانێ ل وەلاتێ فرەنسا ژی راگەھاند کو دڤێت ھەموو چالاکڤانێن کورد ئەڤرۆکە ل ھەموو جیھانێ ب رێیا تۆرێن جڤاکی پشتەڤانیێ ل کەمپینا ئازادکرنا چالاکڤانێن کورد یێن دەستەسەرکری ل ئیرانێ بکەن، چونکو ئەم دشێین ب رێیا تۆرێن جڤاکی شورەشەکێ ل دژی دەستھەلاتا ئیرانێ بکەین، ئەڤرۆکە تۆرێن جڤاکی کاریگەریا خوە ل سەر رایا گشتی ھەنە و دڤێت ئەم دەنگێ خوە بگەھیننە ھەموو جیھانێ و گۆت: (رژێما ئیرانێ دڤێت کوردان بێدەنگ بکەت، ژ کوردان دترسن و ژ بەر ھندێ ژی رۆژانە لاوێن کوردان دەستەسەر دکەن و ل سێدارە ددەن، ئێدی دەم ھاتیە نە تنێ کوردێن رۆژھەلاتێ کوردستانێ بەلکو کوردێن ھەر چار پارچێن کوردستانێ ل ھەمبەر زۆرداریا رژێما ئیرانێ دەنگێ خوە بلند بکەن، دڤێت ئەم چالاکڤانێن دەستەسەر کری یێن رۆژھەلاتێ کوردستانێ ب تنێ نەھێلین و ژ بەر ھندێ ژی کەمپینا بۆ ئازادکرنا چالاکڤانێن کورد گەلەک گرنگە و دڤێت ھەموو کورد پشتەڤانیێ لێ بکەن).
ناڤھاتی ئەو یەک ژی دیار کر کو رۆژھەلاتا ناڤین بەر ب گوھۆرینێن مەزن ڤە دچیت، ب سالانە کار ل سەر گوھۆرینا نەخشێ سیاسی یێ رۆژھەلاتا ناڤین دھێتە کرن، بێگومان کورد دشێن د ھەر گوھۆرینەکێ دا مفادار بن و بگەھنە مافێن خوە، گرنگە کورد د ناڤا خوە دا ئێکگرتی بن و ئێدی دەستان ژ دژبەراتیا ئێکتر بەردەن و گۆت: (د دەمێن بۆری دا ئیرانێ دەست ب ھەوەکا مەزن یا دوژمناتیێ ل دژی ھەرێما کوردستانێ و سەرۆک بارزانی کر، گرنگە کورد ھەموو خوەدان ژ ھەرێما کوردستانێ دەرکەڤن، چونکو ب ھێزبوونا ھەرێما کوردستانێ دھێتە رامانا ب ھێزبوونا پێگەھێ کوردان ل رۆژھەلاتا ناڤین و جیھانێ).
ھەژی ئاماژەپێدانێ یە کو د ماوەیێ بیست رۆژێن بۆری دا پتر ژ سەد چالاکڤانێن کورد یێن رۆژھەلاتێ کوردستانێ ژ ئالیێ ھێزێن ئێمناھیێ یێن ئیرانێ ڤە ھاتنە دەستەسەر کرن و ھەتا نھا ژی چارەنڤیسێ گەلەک ژ وان کەسان دیار نینە و رێکخراوا مافێن مرۆڤی یا رۆژھەلاتێ کوردستانێ ژی داخواز ژ ھەموو سازی و رێکخراوێن مافێن مرۆڤی یێن جیھانی کربوو کو ل ھەمبەر زۆرداریا رژێما ئیرانێ ل سەر کوردان بێدەنگ نەبن و ھەلویستێ خوە دیار بکەن، ب دەھان رێکخراوێن جیھانێ ژی بەری چەند رۆژان داخواز ژ ئیرانێ کرن کو چالاکڤانێن کورد ئازاد بکەت، لێ ھەتا نھا وەزارەتا ناڤخوە یا ئیرانێ و دەزگەھێن پەیوەندیدار ل ھەمبەر داخوازا رێکخراوێن جیھانی چو داخۆیانیەک نەداینە و بێدەنگن.
