بلندبوونا ڕێژەیا پشكداران د قارەمانیێ دا ڕامانا پێشڤەچوونا ڤێ یاریێ یە
چاڤەڕێ دهێتە كرن ئەڤرۆ دەست ب هەڤڕكیێن قارەمانییا پارێزگەها دهۆكێ بۆ یارییا كیكبۆكسینگێ ل هۆلا گرتییا چالاكیێن وەرزشی و دیدەڤانی ب پشكدارییا زێدەتری 120 یاریزانێن كچ و كوڕ یێن نەهـ یانەیان بهێتە كرن، ئەوا دێ ژلایێ فدراسیۆنا كیكبۆكسینگا پارێزگەهێ و چاڤدێرییا لژنەیا ئۆلمپییا دهۆكێ بۆ ماوەیێ دو رۆژان هێتە بڕێڤەبرن.
لدۆر ڤێ یەكێ سالح كەكوو ئەندامێ سەرپەرشتییار یا قارەمانیێ بۆ رۆژنامەیا ئەڤرۆ گۆت: ل دووڤ بەرنامەیێ سالانە یێ فدراسیۆنا كیكبۆكسینگا پارێزگەهێ و چاڤدێرییا لژنەیا ئۆلمپییا دهۆكێ ئەڤ قارەمانییە دێ ئەڤرۆ دەستپێكەت و دهێتە پێشبینیكرن زێدەتری 120 یاریزانێن كچ و كوڕ بۆ ئاستێن پێشكەڤتی، لاوان و تازەپێگەهشتییان یا كێشێن جودا ژ 10 یانەیێن پارێزگەهێ پشكداربن كو دهێتە پێشبینیكرن ئەڤ جارە ڕێژەیەكا زوور بیت.
هەروەسان ناڤهاتی گۆت: پێنەڤێت قارەمانیێن پارێزگەهێ دبیتە تاقیكرنەك و وێستگەهەك بۆ هەموو یاریزان و یانەیان و ڕاهێنەر مفایی ژێ وەربگرن و ئاستێ یاریزانی بهێتە زانین، هەر كێماسیەك هەبیت بهێتە چارەسەركرن، دیسان باشترین بەرهەڤی بیت بۆ قارەمانیێن داهاتی تایبەت قارەمانییا ئیراقێ و نێڤدەولەتی، گرنگ د ڤێ قارەمانیێ دا ئەوە كو بلند بوونا ڕێژەیا پشكداران دناڤا هەڤڕكیێن قارەمانیێ دا ڕامانا وێ پێشڤەچوونا ڤێ یاریێ یە و ئەو پلانا بۆ دهێتە دانان یا سەركەڤتییە.
ل دووماهیێ ناڤهاتی هیڤی خواستن یانەیێن وەرزشی گرنگیێ ب دەنە یاریزانێن ڤێ یاریێ، ژبەركۆ كۆمەكا باش یا یاریزانێن خودان شیان هەنە دشێن ل سەر ئاستێ ئیراقێ و نێڤدەولەتی ژی هەڤڕكییا ناسناڤان بكەن.
