پشته‌ڤانی ل گه‌نجێن نوو هاتینه د ناڤ هونه‌ری دا ناهێته كرن
زاخۆ، عه‌لی حاجی:
سترانبێژ ئه‌ركان عه‌دنان، د دیداره‌كێ دا بۆ رۆژناما ئه‌ڤرۆ دیار كر، هه‌ر چه‌نده ده‌ستپێكا وی یا هونه‌ری یه به‌لێ ئه‌و وێ ده‌ستپێكێ ب سه‌ركه‌ڤتی دبینیت و دبێژیت: نه‌بوونا پشته‌ڤانیا ماددی و مه‌عنه‌وی وه‌كری یه گه‌نجێن ده‌نگ خوه‌ش زێده‌تر دیارنه كه‌ن و گۆت: هه‌تا نوكه من شه‌ش ستران تۆماركری نه و چار ژوان هاتینه كلیپكرن، به‌لێ ئه‌ز ڤێ ده‌ستپێكا خوه ب سه‌ركه‌ڤتی دبینم ژبه‌ركو نه چو كاره‌كێ خراب من دناڤ كلیپا خوه دا ب كارئینایه نه ژی گۆتنێن نه‌جوان و هه‌تا ئه‌و كلیپێن به‌لاڤ ژی بووین چو ره‌خنێن مه‌زن ل سه‌ر نه‌بوون، وه‌كو سترانبێژ ئه‌ز گه‌له‌ك ل سه‌ر په‌یڤێن سترانێ د راوه‌ستم ژبه‌ركو په‌یڤ گه‌له‌ك دگرنگن و كلیپا خوه یا دووماهیێ ب كاره‌كێ باش دبینم و هه‌كه پشته‌ڤانیه‌كا مه‌عنه‌وی هه‌با دا كاره‌كێ باشتر كه‌م ژبه‌ركو من شیانێن باش هه‌نه.
ناڤهاتی گۆت: گه‌له‌ك جاران هه‌ڤالێن من یێ نێزیك دبێژنه من هه‌كه تۆ ل لایێ سوران بای دا بناڤ و ده‌نگتر بی ژبه‌ر كو هونه‌رمه‌ندێن مه یێن بادینی ئه‌وێن بادینی پشته‌ڤانیێ ل گه‌نجێن نوو هاتینه دناڤ هونه‌ری دا نه‌كه‌ن و هه‌تا كلیپا وان ژی ل ده‌ڤ خوه به‌لاڤ ناكه‌ن و هه‌كه كاره‌كێ ب ڤی ره‌نگی بهێته كرن ب دیتنا من دێ بیته پشته‌ڤانیه‌كا مه‌عنه‌وی بۆ گه‌نجێ مه.
